Assassinat de Georges H. Honorat 3 juin 1957 – 23 mars 2013: la fin de l’homme, mais
pas du mythe.
Tire
bal la fè twou
pou-l pase rantre
l’ale, li travèse
depi se trip,
depi se pye, jizye,
mwèltèt.
Li pase an boulin,
an boulvès
li vire antre
bourade kraze
wa di
yon bagay
l’ap chache nan mitan fèy papye.
bal la kwaze
ak kat tikatkat
ki te chita ap etidye
b, a
ba
aba!
Bal la antre ba
nan listwa kò kay la
li bwase bil
tout bagay.
Vè chavire bouch anba,
tab panche sou de pye,
chèy pay rale sou dèyè
pou yo sove ale.
Alewè pou moun
ki isit,
ki lòtbò,
ki lan malsite.
Bal la fè twou,
li fè tout sa-l konnen
pou-l pa kite anyen
dèyè
k’ap bouje
ki kanpe djanm
sou de pye.
Bal la fè twou
Toupatou
pou-l pase.
Tout bagay blese
Malman
ki manman,
ki papa,
ki pitit.
Sa w vle,
bal ap tire-san-manman
e moun se vyann ak po,
epi san k’ap koule ale
nan randevou venn kè
pou mèvèy lavi jwenn wout
kontantman.
Men vwala
moun blese, moun mouri,
pou lide yo vle defann
lide tètdi
lide libète
byen kanpe
ki pran lari nan twou bal
ki pran lari toutouni y-ap chante:
mon kaporal, toup! tou pa-w dèyè! (bis)
mon jeneral bow! tou pa-w rive! (bis)
Georges Castera