Plizzyè responsab Pati Politik tankou : Jerry Tardieu, Clarens Renois, Claude Joseph, Andre Michel , Pascal Adrien, Maryse Narcisse, Joël Vorbe, Moïse Jean Charles ,Magalie Comeau te chita pale ak Antony Blinken Jedi 5 Septanm 2024 la.
« Etazini bò kote Ayiti. M obsève gen lespwa, sitou nan enfrastrikti enpòtan gang yo te kontwole, ki kòmanse reprann, pa egzanp ayewopò Tousen Louvèti ak Lopital Jeneral. » Se nan konferans pou laprès chèf diplomasi amerikèn nan Antony Blinken bay 5 Septanm 2024 la nan kad vizit li ann Ayiti.
Sekretè Deta ameriken an Antony Blinken, anonse yon nouvèl èd imanitè 45 milyon dola ak peyi Dayiti, pandan vizit li nan peyi a, jodi jedi 5 septanm 2024 la.
Aprè rankont li ak otorite tranzisyon an, li te vizite baz fòs miltinasyonal soutyen apui ak Sekirite a.
Selon prezidan Edgard Leblanc sekretè Deta ameriken Antony Blinken pa mande ekate 3 konseye prezidan ki enplike nan eskandal koripsyon BNC a.
Deba yo te apiye sou sekirite ak eleksyon.
Blinken ap antre Sendomeng pou rankontre Abinaner vandredi 6 septanm nan.
Antony Blinken mande renouvle manda fòs miltinasyonal la nan peyi Dayiti. « Nan sitiyasyon malouk sa, nou bezwen plis finansman,plis pèsonèl pou kore misyon an ».
Se sa l deklare pandan l te vizite baz fòs la ayè jedi 5 septanm lan. Manda misyon an ap ekspire 2 oktòb 2024
Aprè seri vizit ak rankont li yo sekretè deta Blinkin konkli genyen gwo avanse ki ap fèt ak ekip gouvènman an plas la pou mennen Ayiti nan wout stabilite, lapè ak eleksyon demokratik.
Vyòl kolektif sou timoun: Pakè Mibalè fè yon liberasyon ki sisite gwo deba
An Ayiti, ka vyòl yo pa sispann ogmante nan diferan komin nan peyi a pandan lalwa pini sevèman ka sa yo
Maidoudeline se yon ti moun 15 lane ki ta viktim vyòl kolektif nan ri Yanyan Mibalè nan fen mwa Out 2024 la, aprè yo te fin maltrete li anpil selon sa li eksplike. Malgre sa sibtiti komisè gouvènman Jean Thomas Lans libere youn nan prezime konplis vyòl la ki se Jean Jean nan dat 30 Dawout 2024 la. Yon liberasyon divès profesyonèl nan dwa reproche sou baz li fèt dèyè do lalwa e nan opasite.
Minè a ki se Maidoudeline te esplike anviwon 3 jèn gason kenbe li yo vyole li, bat li, malgre li te genyen règ sou li sa pat anpeche yo te kontinye vyole epi bali gwo presyon lanmò pou li pat pale.
« Se yon jenn gason ki rele Dann ki abite nan ri Yanyan ki te pranm ki pati avèm, li fèmen m nan yon machin pandan 2 jou san manje epi plede fè bagay avèm. Aprè sa li ale fèmen m kay yon zanmi li ki rele Jean Jean ki te genyen lòt zanmi li la tou. Yo t ap fimen bòz epi bwè kleren, yo fòsem fimen tou epi bwè aprè sa yo vyole mwen. » Se sa viktim nan te fè konnen.
Mèt Robenson MAZARIN ki se direktè egzekitif òganizasyon Inityativ Sitwayen ki ap defann dwa moun nan respè lalwa Ayiti (ICIDDHREL-HAÏTI) denonse pakè Mibalè ki gen nan tèt li Mèt Odania BLANC ki remèt Mèt Jean Thomas Lans dosye vyòl sila ki bafwe dwa timoun 15 lane a oprofi vyolè li yo.
Jean Jean lapolis te arete 28 Dawout nan kad dosye sila aprè yon manda rale mennen vini nouvo Komisè gouvènman Mibalè a Mèt Odania BLANC te emèt epi jij depè Drixnel Thélémaque te fè enfòmasyon preliminè yo fè konnen li pa menm rekonèt demwazyèl la ale wè pou li ta vyole li. Toutfwa li avwe Dann se zanmi li e tidam nan se madanm Dann li ye.
Selon sa divès sous rapòte, se vre se Mèt Odania BLANC ki komisè prensipal pakè a ki poko gen yon bon mwa nan pòs la men, majorite dosye enpòtan ki genyen yo, se Mèt Jean Thomas Lans ki se yon sibstiti komisè Odania remèt pou trete yo.
Rapò “ULCC” fè sou Pwogram Nasyonal Kantin Eskolè a sòti oktòb 2016 pou rive fevriye 2021
PNCS (Program Nasyonal Kantinn Skolè) nan rapò ULCC prezante bay Leta ayisyen an montre sou lidèchip Madam Phanèse R. LAGUÈRE pwogram nan te gen anpil zak vandalis ak koripsyon
Selon sa ULCC di nan kòmansman ane 2022 a anpil rimè koripsyon t ap kouri sou Program Nasyonal Kantin Skolè a, sa ki te motive Direktè general ULCC a Kreye yon komisyon ankèt selon atik 11 ak 12 nan dekrè 8 septanm 2024 la. Komisyon sila te gen pou ankete sou fonksyonman PNCS la kòmanse oktòb 2016 rive fevriye 2021.
Toujou nan kad travay ankèt la ULCC te rive tande plizyè ansyen responsab ak nouvo responsab nan PNCS pami yo; Djina Guillet DELATOUR, aktyèl kowodonatris general PNCS, Enos Charles, ansyen direktè administratif; Jean Ricard Variste, ansyen direktè lojistik; epi Phanèse R. Laguerre, ansyen kowòdonatris general
Plizyè direktè lekòl ki benefisye Program Nasyonal Kantin Skolè a te repon kesyon, moun ki te konn founi manje ou materyèl te envite pou repon kesyon epi kèk adrès te oblije verifye pou si egzakteman founisè sa yo egzite, plizyè dokiman bankè te analize epi verifye.
Nan tout dosye acha ki fèt kòmanse oktòb 2016 rive fevriye 2021 Komisyon Ankèt la jwen dekesman Twa San Katre-Ven De Milyon Senk San Tran-tuit Mil Sis San Karan-si Goud 14/100 (Gd 382,538,646.14) acha pwodui alimantè ki fèt sou administrasyon Madam Phanèse R. LAGUÈRE.
Sepandan selon sa ankantè yo di majorite nan founisè yo ki founi manje nan kad pwogram sila pa gen oken adrès fizik, sèlman yon sèl biznis yo jwen ki idantifye 29, Angle Delma 49 et Otowout Delma
Aprè konsta sa yo ankèt la revele 90% biznis sa yo se bagay ki fiktif selon menm rapò gen plizyè anplwaye nan pwogram nan ki kreye biznis fiktif sa yo pou rive fè lajan sou Leta se ka; Alberto DORT ki kreye yon antrepriz fiktif sou non “Endivenpral Import-Export ”, Miratel Fanor non antrepriz li se “ La Trévienne Production” kont bankè yo jwen de lòt ki siyen ak yo non yo se; Paul Wilson Jean Hilaire et Dieu- Donne François, ak de lòt anplwaye PNCS.
Avèk teknik pou rive kreye antrepriz fiktif sa yo Leta rive fè yon defisi aviwon De San Sekant Milyon Twa San Swasant-sèz Mil San Ktre-ven-Sèt goud epi 13/100 (250,376,187.13 Gd) lajan sa yo ke trezò Piblik pèdi plis San Di-sèt Milyon Sis San Sekant Kat Mil Kat San Sekant Kat goud epi 63/100 (117, 654,454.63 Gd) konsènan plizyè ka priz enterè ilegal.
Nan pousuiv ak ankèt la montre Madam Phanèse R LAGUERRE ak Mesye Junior Lavaud CELICOURT yo itilize fonksyon ou byen pouvwa yo pou fè divès magouy nan pwogram ou byen fasilite moun fè magouy.
Genyon 11 lekòl ki nan Lwès, Nò, Latibonit, epi Sant ki enskri nan pwogram nan ki pa rive jwen manje sa ta dwe ye, nan rapò a yo di aklè manje sa yo detounen fè lòt wout.
Selon menm rezime rapò ULCC a genyen plizyè kad nan Pwogram Nasyonal Kantin Skolè a pami yo; Alberto DORT, Miratel Fanor, Paul Wilson JEAN HILAIRE, Dieu-Donne FRANÇOIS et Junior Lavaud CELICOURT fè konplo ak ansyen kowòdonatris general la nan kreye plizyè antrepriz fiktif pou fè lajan nan Pwogram nan.
Emmanuel Saintus