Polisyè Michelle Nathanielle Megine tonbe anba bal nèg ak zam nan dèlma 75, pandan l pral travay.

Polisye yo kontinye ap tonbe anba bal gang nan peyi a, malgre detèminasyon lapolis la eksprime pou derasinen fenomèn ensekirite a nan sosyete a. Jodi mèkredi 28 dawout 2024 la, Sendika Nasyonal Polisye Ayisyen yo (SYNAPOHA) enfòme sou kont X li, endividi ak zam rive atake byen bonè nan maten, polisyè Michelle Nathanielle Megine ki fè pati 28e pwomosyon lapolis la.

Ayiti elektrisite: Dosye kouran nan plato santral, kèk propozisyon itil

Dosye idwoelektrik Pelig la ki anpàn sa te kèk jou, mete anpil deba nan mitan popilasyon an nan wo ak ba Plato Santral, patikilyèman nan vil Mibalè. Sitiyasyon sa a ta pral debouche sou yon manifestasyon ki planifye pou lendi 2 septanm 2024 la, kote sitwayen yo anonse yo pral mache pou mande leta Ayisyen ba yo kouran an jan sa te ye o paravan, san pèdi tan.

Nan sans sa a, Sadrax ULYSSE ki se yon jèn enjenyè nan devlopman lokal, ki se jounalis epi etidyan nan Syans Jiridik, prezante gran piblik la yon pwopozisyon pou yon soti nan kriz kouran sa a ki repete a plizyè repriz nan Mibalè ak zòn ki anviwonnen li yo.

Nan 4 gran pwen, men ansanm pwopozisyon jèn entelektyèl la fè yo:

«1- Fè chwa pou yo prete plato santral youn nan transfòmatè komin Kafou yo ki p ap regle anyen, annatandan yo achte youn ki tou nèf pou rejyon an.»

«2- Ansyen anplwaye teknik Smith Brutus nan nòt vokal li yo fè divès gwo revelasyon. Sadrax kwè sosyete sivil la te ka pran yo, ekri yon dokiman kòm yon kaye dechaj pou egzije Direktè ED’H la ak Minis MTPTC a pou fè yon ti pwojè bay gouvènman Garry Conille an pou rezoud pwoblèm sa yo definitivman.»

«3- Egzije yon pwomosyon pou youn pami meyè teknisyen ki nan santral la ki se moun plato a, pou mete li nan yon pòs ki ka fè li genyen je sou rezo lokal la. Men fòk li genyen kapasite pou sa.»

«4- Li swete sitwayen yo, evite pran solisyon fasil yo pou evite yo retonbe nan menm pwoblèm nan ankò aprè 3 ou 6 mwa. Li mande kominote a tou pou yo pa ko dakò yo rebobine transfòmatè a ba yo. Pa ko ale nan opsyon transfòmatè ki alimante Laskawobas ak Beladè yo. Opsyon sa yo ta dwe dènye rekou kominote a.»

Prefere rejyon an pran yon ti tan soufri men solisyon yo dirab. Sadrax di li sipòte manifestasyon an k ap fè responsab yo aji pi vit, paske Leta Ayisyen se yon Leta ponpye.

Li fini pou swete tou moun Mibalè ak Ench e tout lòt komin yo, aprann sipòte moun ki genyen konesans lakay yo epi depi moun nan ap fè travay li byen, evite fè revoke li pou remèt pòs la ak yon etranje nou pa menm konnen. Depi genyen konpetans egal epi moun nan pa vòlè kowonpi, nou dwe priyorize lakay nou.

Misyon miltinasyonal sekirite Ayiti: 2 mwa deja pou ki bilan

Anviwon 400 polisye Kenya debake Ayiti nan kad deplwaman fòs miltinasyonal ONU te aprouve pou vin tabli lapè nan peyi a pandan yo dwe pote koutmen ak polis nasyonal la ap kouri sou mwa prèske san bilan.

Pou anpil ayisyen ki t ap tann fòs sa delivre yo anba mizè gang yo, kòmanse pèdi espwa. Selon sa plizyè militan chann mas rakonte ak jounal la, yo pa rete kwè misyon sila ap fè siksè lè yo obsève mank volonte ak blòf kominote entènasyonal la ki ap pase Ayiti nan betiz. Yo menm ap poze kesyon pou konnen ki vrè objektif misyon an.

Selon rapò plizyè ajans ONU pibliye genyen plis pase 600 000 mil moun gang yo fòse kite kay yo, e ki ap viv nan yon sitiyasyon difisil Ayiti. Gang yo kontinye ap kraze komisarya, fè kidnapin, pran nouvo zòn epi teyorize popilasyon an anba je fòs miltinasyonal la.

Si pou anpil ayisyen polisye Kenyen yo p ap regle anyen men lapolis Kenya rapòte pandan 2 mwa sila yo gentan fè gwo travay Ayiti tankou: pran kontwòl Ayepò peyi a nan men gang yo, pi gwo sant ospitalye peyi a ak sekirize gran aks woutye yo.

Daprè yon atik jounal Ameriken CNN pibliye, polisye Kenya yo poko resevwa tout lajan yo te dwe jwenn pandan 2 mwa yo genyen an Ayiti a, an atandan Responsab MMS mande polisye Kenya pa bezwen inkyete yo rès lajan ki manke a ap depoze sou kont bankè yo . Nan yon rapò avansman (NPS ) sèvis polis Kenya pibliye li fè konnen polisye Kenya kontinye ap resevwa salè yo nan peyi Kenya, men yap tann pou yo resevwa yo tout lajan ki te prevwa pou yo nan misyon an paske se yon misyon ki riske anpil .

Yon fòs ki te dwe genyen Anviwon 2500 moun ladan li pou yon dire yon lane, jiskaprezan se sèlman 400 polisye li genyen ki ap plenyen paske yo pako genyen ase materyèl ak ekipman pou yo travay.

Emmanuel Saintus