Liberasyon direktè jeneral IKREF la

Apre 7 jou fèmen nan Penitansye nasyonal epi nan anèks li an nan Pako, direktè jeneral inite santral ransèyman finansyè an, IKREF, Jean Yves Noël, jwenn liberasyon lendi 29 me a. Se jij Jean Peres Paul ki te òdone liberasyon l sou demand avoka li yo. Jean Yves Noël te jwenn arestasyon l lendi 22 me a sou plent isye tribinal sivil Pòtoprens lan, Réginald Saint Jean, li akize l kòm moun ki te anlve epi sekestre l pandan l t al siyifye yon desizyon jistis nan yon bank nan kapital la.

            Arestasyon direktè jeneral IKREF la te soulve kèk pwotestasyon nan kèk òganizasyon nan sosyete sivil la kidonk laboujwazi: yo te mande pou limyè fèt sou afè sa a.

Arestasyon 480 ayisyen an Repiblik Dominikèn

Otorite dominikèn yo arete 480 ayisyen yo di ki t ap tante antre an Repiblik Dominikèn de fason ilegal pandan fen mwa me a. Yo fè konnen yo te arete 100 ayisyen dimanch 28 me a, lendi 29 me yo arete 200 e madi 30 me yo arete 180. 

Edmond Mulet vle ranfòse okipasyon an

Nouvo reprezantan sekretè jeneral Nasyonzini an an Ayiti, diplomat gwatemaltèk la Edmond Mulet, ki rantre vandredi 2 jen an, te fè yon deklarasyon avan sa, pou l te mande entegrasyon jij peyi frankofòn yo nan sistèm jidisyè ayisyen an. Nouvo chèf Minustah a, Edmond Mulet, mande pou l genyen plis pouvwa pase moun ki te la avan li an, Juan Gabriel Valdes.

            Deklarasyon sa yo te pwovoke anpil reyaksyon nan tout sektè nan peyi a, e menm demagòg ki t ap konspire pou vann peyi a kou wè batonye lòd avoka bawo Pòtoprens la, Gervais Charles, ki kalifye pwopozisyon sa a, kòm yon «volonte pou vyole konstitisyon ayisyèn lan» Pou minis Jistis la, Henri Marge Dorléans «Se sou titèl yo vle mete jistis ayisyèn la». Prezidan komisyon jistis sena a, Youri Latortue bò kote denonse sa l rele «Yon two fòt enjerans kominote entènasyonal nan afè ayisyèn». Li fè konnen fòk yo respekte souverènte nasyonal la. Rezo nasyonal defans dwa moun yo RNDDH mande respè endepandans pouvwa jidisyè a. Tout sektè nan sosyete a kondane deklarasyon Edmond Mulet la, yo fè konnen se pa yon solisyon pou pwoblèm lajistis la ann Ayiti, se yon fo solisyon pou yon pwoblèm ki reyèl.

Eleksyon minisipal  yo ant jiyè e septanm

Dapre konseye elektoral, Pierre Richard Duchemin, Konsèy elektoral pwovizwa a (KEP) ap prepare l pou l òganize eleksyon minisipal e lokal yo ant mwa jiyè e septanm. Konseye a fè konnen responsab KEP yo rive jwenn yon antant avèk tout patenè nan pwosesis elektoral la pou yo  ka òganize eleksyon yo nan dat yo prevwa a. Pierre Richard Duchemin deklare: «Kòm nou konnen PNUD k ap jere fon yo, Minustah k ap bay asistans teknik ann operasyon avèk KEP la e operatè KEP la nan diferans nivo pral mete an bran l tout sa k posib sou plan teknik, administratif, lojistik pou yo kapab reyalize objektif yo fikse a.» 

Fowòm jèn nan Bamako

Ayiti ap prezan nan fowòm jèn yo sou devlopman medya yo k ap fèt a Bamako nan Mali soti 4 pou rive 8 jen 2006. Fowòm sa a, se yon rankont entènasyonal k ap reyini jèn k ap soti nan 46 peyi. Delegasyon ayisyen la ap genyen l2 manm pèsonèl plan Ayiti ak 2 jèn k ap soti nan depatman Nòdès ak Lwès.

Sa Latortue fè ak lajan yo?

Direktris rejyonal Bank Mondyal, Caroline Anstey drese yon bilan negatif sou kantite lajan ki te depanse nan kad pwogram CCI a sou gouvènman defakto Alexandre/Latortue. Li fè konnen yo pa t mete ase lajan pou kèk sektè kouwè elektrisite e bidonvil yo ; echèk nan lajistis. Li fè konnen bayè de fon ap genyen pou reyini nan Pòtoprens 25 jiyè k ap vini la a pou evalye sitiyasyon an. Li deklare : «Si priyorite gouvènman ap chanje, finansman bayè de fon dwe chanje sektè yo.» Palmantè bò kote pa yo fè konnen yo pral konvoke responsab defakto yo pou yo vin bay eksplikasyon sou 964 milyon dola bayè de fon ta debloke nan kad CCI a pandan 2 lane rejim defakto a.

Kidnaping ap kontinye

Lendi 29 me a, plizyè nèg ame antre lakay pwofesè Burel Decopain, ki te fèk rantre lakay li, ale avèk li. Burel Decopain se visdwayen afè akademik nan « Institut des Hautes Etudes commerciales et économiques, IHECE» e pwofesè nan fakilte dwa e syans ekonomik nan Pòtoprens. Apre etidyan te fin pran nouvèl sa a, yo te fè 2 jou yo t ap manifeste, madi 30 ak mèkredi 31 me kont kidnapin ak jij kowompi e mande liberasyon pwofesè yo. Kidnapè yo te rive libere pwofesè a mèkredi swa byen ta apre fanmi l te fin bay yon bon valè lajan kòm ranson.

            Dapre yon dènye bilan PNH ak Minustah pou mwa me a sèlman, yo anrejistre yo ventèn kidnapin e arete 31 prezime kidnapè. Men genyen plizyè lòt kidnapin ki ta fèt, lapolis ak Minustah pa konte, fanmi yo trete san bri san kont avèk kidnapè yo.

Brezil ak Chili ap kite twoup yo ann Ayiti

Minis Afè etranjè Chili a, Alejandro Foxley te chita pale avèk prezidan Brezil la, Luiz Inacio Lula Da Silva e Chèf diplomasi li a, Celso Amorim, madi a Brazilya sou sitiaysyon ann Ayiti. Yo deside pou yo kite twoup yo ann Ayiti jiska se ke pwosesis lapè a jwenn yon bout. Rankont sa a te pèmèt yo evalye evolisyon Minustah ann Ayiti e patisipasyon yo nan reyabilitasyon ekonomik Ayiti anplis de objektif politik yo nan kad retablisman lapè sivil ann Ayiti, Ajantin, Chili e Brezil se 3 peyi Amerik di Sid ki pi cho devan bann ann Ayiti nan Minustah, yo 3 a yo fòme yon gwoup ki rele ABC, yo fè konnen yo genyen kèk pwojè ekonomik pou ede gouvènman nouvo prezidan ayisyen an René Préval.

Vizit minis Afè Etranjè Kanada

Minis kanadyen Afè etranjè an, Peter Mackay anonse  sou dosye Premye minis ratifye a, Jacques Edouard Alexis, li te rankontre avèk komisyon afè etranjè Chanm  Komin lan pou l te poze pwoblèm lan, li deklare gouvènman li an pra l fè tout sa l kapab pou l bay nouvo Premye minis an, Jacques Edouard Alexis viza pou l antre nan peyi Kanada. Li deklare « Pòt Kanada pral rete louvri pou M. Alexis, paske se yon bagay trè zenpòtan pou nou jwenn posibilite pou diskite direkteman avèk Premye minis Dayiti a ».

            Premye minis Kanada a bò kote pa l, Stephen Harper te retire responsabilite afè sa a sou do l, li lage sou do ansyen gouvènman liberal premye minis Paul Martin an ak konseye li depite liberal Denis Coderre li di ki te pran sanksyon kont Jacques Edouard Alexis.

Prezantasyon politik jeneral

Apre anpil traktasyon ki t ap fèt sou fòmasyon nouvo gouvènman an; prezidan sena a Joseph Lambert ekri Premye minis lan pou l mande vin prezante deklarasyon politik jeneral li madi 6 jen an.