Konsèy sekirite a salye envestiti Préval

Dimanch 14 me a, prezidan René Préval te prete sèman devan Asanble Nasyonal la pou yon manda 5 ane. Nan diskou li, nouvo Chèf Leta a plede anfavè revizyon manda Minustah a. Li fè konnen fòk Minustah a transfòme l an koperasyon teknik nan kad devlopman peyi a.

            Nan deklarasyon Konsèy sekirite Loni a te fè lendi 15 me a, yon jou apre envestiti a, li salye nouvo prezidan an e li mande pou eleksyon minisipal yo, lokal e rès lejislatif yo ta fèt tousuit pou konsolide enstitisyon demokratik yo.

            Prezidan Konsèy sekirite pou mwa me a, Bazil Ikouebe ki se yon Kongolè, nan yon deklarasyon nan non tout manm konsèy la felisite prezidan Préval. Li lanse yon apèl bay donatè yo pou yo kontinye bay nouvo gouvènman an èd pou l ka fè peyi vanse.

Koperasyon kiben an ap vanse

Nan kad koperasyon Kiba ak Ayiti, visprezidan Konsèy Deta Kiben an, Esteban Lazo ki te genyen avèk li minis Envestisman etranje e kolaborasyon ekonomik, Marta Lomas te rankontre prezidan René Préval lendi 15 me a. Rankont lan te dewoule nan yon atmosfè fratènèl kote yo te pale sou fason 2 peyi yo ap kontinye devlope kolaborasyon bilateral yo nan tout domèn posib. Rezilta koperasyon Kiba a, k ap travay anfavè pèp ayisyen toujou trè pozitif. Esteban Lazo te pwofite pou l te rankontre avèk 115 kiben k ap travay nan plizyè domèn nan peyi a.

Yon lòt kote 23 me k ap vini la a, genyen yon reyinyon k ap fèt Brezil sou asistans finansyè pou Ayiti. Etazini ap voye yon delegasyon k ap genyen: asistan sekretè Deta pou afè emisferik la, Thomas Shannon; asistan administratè USAID pou Amerik Latin ak Karayib la, Adolfo Franco; reprezantan Bank mondyal, bank entèamerikèn pou devlopman, Nasyonzini e OEA. Nan reyinyon sa y ap evalye asistans finansyè entènasyonal 800 milyon yo te bay deja premye minis defakto a Gérard Latortue e prepare konferans donatè yo ki genyen pou fèt nan mwa jiyè a.

Latortue dwe rann kont sou vòl nan Ilavach

Visprezidan Chanm depite a, Geneste Jean David, ki eli sou banyè pati Alyans pou sikonskripsyon Cayes-Ilavach, mande otorite jidisyè yo ak tout lòt enstans ki konsène pou pran responsabilite yo sou dosye siyati kontra 27 out 2004 la. Se gouvènman defakto Alexandre/Latortue a ki te siyen yon kontra sispèk ak konpayi etranjè pou fè rechèch anba lanmè nan zòn Ilavach. Depite a fè konnen li genyen bon jan enfòmasyon genyen plizyè pyès lò e emewod avèk plizyè kanon bwonz ki koute plizyè milyon dola ki disparèt nan Ilavach. Dapre depite a, siyati kontra a montre degre koripsyon ki te genyen nan gouvènman defakto a. Plizyè lòt depite te pale nan menm sans lan. N ap raple nan yon nòt Primati a te fè sou dosye sa a te tante dedwane Premye minis defakto a, men minis Kilti ak Kominikasyon an te demanti Latortue e fè konnen Latortue te la lè kontra a t ap siyen nan sal konferans ministè Ekonomi ak Finans.

Fen misyon pou Juan Gabriel Valdés

Vandredi 12 me a, reprezantan espesyal sekretè jeneral Loni an ann Ayiti, Juan Gabriel Valdes te òganize yon seremoni lakay li, nan kapital la, nan okazyon fen misyon l ann Ayiti. Moun ki te prezan, se prezidan René Préval, Premye minis defakto a, Gerard Latortue ak plizyè lòt lidè politik tankou: Paul Denis, OPL; Luc Mésadieu, Mochrenah; Charles Henri Baker; Himler Rébu, GREH; Hubert Deronceray, GFCD.

            Juan Gabriel Valdés te fè bilan aktivite Minustah te fè sou direksyon l e li fè konnen kominote entènasyonal la detèmine pou akonpanye prezidan Préval la. «Nou pral fè tout sa nou kapab pou twouve lajan ak lòt api ki nesesè nan kominote entènasyonal la pou prezidan Préval kapab genyen yon gran siksè pandan manda li a.» N a wè sa, men se pa premye fwa nou tande sa.

            Sekretè jeneral Nasyonzini, Kofi Annan nome yon diplomat gwatemaltèk, Edmond Mulet pou ranplase Valdés. Edmond Mulet ki genyen 55 lane se anbasadè Gwatemala nan Inyon ewopeyèn, Beljik ak Liksanbou. L ap genyen pou l vin dirije Minustah a.

Sitiyasyon nan kapital la

Dapre pòtpawòl Polis nasyonal la (PNH), Frantz Lerebours, nan dènye konferans pou laprès li te bay mèkredi 17 me a, ensekirite a bese nan kapital la, e lapolis trete sèlman 67 afè kont 102 li te trete nan semèn avan an; sòti 10 pou rive 16 me lapolis fè 87 arestasyon nan zòn metwopolitèn lan kont 150 nan semèn avan an.

            Kidnapin yo fè yon bese tou, se sèlman 5 ka selil antikidnapin lan anrejistre e yo arete 13 moun kont 27 nan semèn avan. Lapolis dekouvri 12 moun ki mouri nan lari, 10 ladan yo resevwa bal e 2 lòt anba zam blanch.

            Sou sa ki te pase nan Penitansye nasyonal la 14 me, menm jou ak envestiti prezidan Préval la, Frantz Lerebours fè konnen pat genyen yon tantativ evazyon jan yo ta fè kwè li a. Men dapre yon kominike Direksyon administrasyon penitansyè a (DAD) genyen 11 prizonye ki blese grav e gen 7 yo transpòte lopital e 5 ajan ki blese. Pou Rezo nasyonal defans dwa moun, genyen yon karantèn prizonye ki blese pami yo gen 5 ki trè grav e 3 ajan penitansye blese.

Blakawout nan lopital Jistinyen

Lopital Jistinyen Kap Ayisyen plonje nan yon veritab blakawout depi kèk tan, se ak bouji doktè sèvi pou bay malad swen, pou fè akouchman. Administrasyon lopital pa genyen lajan pou yo achte gaz pou mete nan delko.

Charles Henry Baker ap pwoteje pitit pitit li

Jounalis nan diferan estasyon radyo nan kapital la ap kontinye deba tradisyonèl sou plizyè faktè konjonkti politik la ap pote e natirèlman diskou envestiti prezidan Préval 14 me pase a ak premye zak li nan kad dezyèm manda sa a se pwen cho ki bay diferan «lidè» politik okazyon pou repozisyone yo e an menm tan tou pèmèt pèp la ka tou wè kote l gad. Menm «lidè» ki deja pa vo anyen nan eleksyon kote pèp patisipe, men ki danjere nan kad konplo destabilizasyon ak pwojè mizè pa mas pòv yo. Plizyè ekzanp gen pou vini sètènman men Charles Henry Baker sou bò pa l pran devan nan yon emisyon sou radyo Vizyon 2000 jou dimanch 21 me a kote li t ap bay opinyon l sou akò Petrokaribe a.

Alapapòt Baker avanse yon prezonpsyon koripsyon sou repitasyon prezidan Préval lò li fè konnen 40% lajan an gen posibilite pou l pa itilize nan kad pwojeksyon prezidan an ap inisye a. Kidonk li ka fè wout krochi tankou milya dola Latòti a, anfèt sa pa alòddijou. Sepandan tout moun ka konstate menm OPL pa janm oze prezante Préval kòm dilapidatè fon piblik. Yon lòt kote tout moun ka konprann santiman chimerik yon boujwa eksplwatè lè li tande yon prezidan gen sousi pou pwojè sosyal ak amelyorasyon kondisyon lavi pèp.

Sepandan yon eleman sinik pa gen entèdiksyon pou l imajine yon agiman akseptab lè li pa dakò ak yon lide e fè oditè gras pou yo pat tande Baker ki reyalize kado prezidan Chavez la ki dayè ap fèt nan kad yon akò entegrasyon rejyonal te ka yon kado anpwazone. Se pou w ta kwè Baker se yon militan altèmondyalis avangadis ! Antouka Baker gen anbisyon pou striktire pati Respè a, FMI, BID ak Bank mondyal mèt pran nòt.

Jacques Edouard Alexis ap pare l pou premye minis

Aprè deziyasyon ofisyèl Jacques Edouard Alexis kòm Premye minis lendi 12 me a pa prezidan René Préval, sa pa t pran tan pou ansyen minis Edikasyon nasyonal la epi tou ansyen Premye minis prezidan Préval nan premye manda l (mas 1999-fevriye 2001) an t al fè premye demach li devan palman an nan kad pwosesis ratifikasyon l. Alexis depoze pyès devan Sena a madi 23 me a e prezidan komisyon spesyal Sena ki monte pou etidye dosye yo fè konnen yo pral travay san pran souf prezante rapò yo pou pita nan 48tè daprè presizyon senatè Lespwa Emmanuel Limage prezidan komisyon an te bay laprès. Nan okazyon sa a plizyè responsab platfòm Lespwa te akonpanye Premye minis deziye a tankou ansyen depite Joseph Jasmin, ansyen depite Alix Fils-Aimé, ansyen minis Jean François Chamblain.

            Kidonk se pa etonan, pwofil Jacques Edouard Alexis, tamperaman l, konpetans li, pase politik li te trennen anpil kòmantè sinon menm reyaksyon. Men sitou kwòk anjanb diplomatik peyi Kanada ki te deja mete non Alexis nan yon «lis gwoup ansyen ofisyèl gouvènman Lavalas ki ta fè krim kont liminate» (Radio Kiskeya, 23-05-06) vin mete lwil sou dife.

            Sepandan Premye minis deziye a fè konnen: «Prezidan Préval konnen mwen reyini kondisyon ki ka pèmèt peyi a fè yon nouvo demaraj. Ak fòs apwi prezidan Préval. Ak fòs platfòm Lespwa reprezante. Ak fòs ouvèti prezidan an ak Lespwa ap fè pou al chèche patenarya ak koperasyon bò kote lòt sektè politik ak gwoup nan sosyete sivil la mwen gen yon chans pou mwen ta vin nouvo Premye minis peyi a». Pou moun ki repwoche l kòmkwa li se yon pèsonaj awogan epi konfliktyèl, Jacques Edouard Alexis reponn se abitid li pou l di laverite kri ki fè yo pèsevwa l konsa men li afime li pa chanje. Senpleman li estime se preferab pou l jwe ak franchiz plis transparans menm si dorenavan l ap chèche fòm ki gen plis souplès pou kontinye di verite san li pa sèvi ak sa l rele «meta langage», ni bay manti ak pwomès li paka respekte.

            Jacques Edouard Alexis kòmanse revele kèk aspè nan filozofi gouvènman an pra l adopte nan ka li ta vin chèf gouvènman an ki sipoze rasanble anpil valè nan plizyè sektè nan peyi a. Li siyale «atou li pral mete devan se eksperyans li, patriyotism li, yon konpreyansyon anje yo ak defi yo jodi a ki montre fòn rasanble, fòn jwe sou dyalòg, eksplikasyon paske sitiyasyon an pa fasil. Pèp la ap tann anpil bagay nan men gouvènman an ni palman men afòs nan chèchè koperasyon pèp la, patisipasyon l, afòs eksplike n ap jwenn mwayen pou n avanse ak kesyon modènizasyon Leta a, ak pwodiksyon nasyonal la. Sekirite ak lapè pou n mete nan peyi a. Respè pou n chèche kote patnè entènasyonal yo pou yo konnen Ayiti se yon peyi tankou yon lòt epi pou rive nan rekiperasyon souvrente peyi a». Kantite eleman vrèman vre ki ta kapab sèvi baz pou deba pwodiktif sitou lè nan yon nivo oubyen yon lòt gouvènman an tava pran yon opsyon ki an depaman ak enterè veritab mas pèp la. San bliye kondisyon politik ki pote platfòm Lespwa opouvwa kidonk mobilizasyon mas yo pap kapab kontante yo ak bèl pawòl, eksplikasyon vid, bèl swè pou lapè san jistis, jistis sosyal elatriye. Nou ta byen renmen pa egzanp gen plis detay sou kisa Alexis rele «modènizasyon Leta» a. Men se konte selon tout aparans san pretansyon jiskoboutis pati OPL an alyans ak pati Konba ki regwoupe 15 depite ki deja kanpe an kwa kont presizeman pèsonaj Jacques Edouard Alexis. Sa k pi rèd la apwòch san respè minimòm chèf defil kowalisyon konze sa yo depite Acluche Louis Jeune pa rapò ak prezidan René Préval kite sou bò pa l devan palman lendi 22 me a deja rabese prestij enstitisyon an e moun ka sipoze s ak pral pase an konparezon ak sa k te konn pase. Paske nou ka raple n palman ak majorite OPL sou premye manda prezidan Préval se te veritab blokaj devlopman peyi a e tout desizyon nan yon sans malere pou pèp la tankou likidasyon antrepriz Leta te pran ak bonjan benediksyon yo. E sou kesyon akizasyon vilgè e san fondman Kanada ap eseye lage dou do plizyè ofisyèl Lavalas pami yo Alexis jwen rezonans san rezèv pote sou Acluche Louis Jeune ki konpòte l la tankou yon veritab restavèk paske diplomasi kanadyèn pap pran tan pou l reyalize ke li pase tèt li nan betiz kòm pwomotè rejim sanginè Alexandre/Latortue a alòske Premye minis Jacques Edouard Alexis ki kalifye demach sa de «movèz plezantri», li brandi fyèman pou prèv 2 pwosè kite reyalize nan peyi a sou gouvènman l lan kote Leta te pran responsabilite pou kondane kriminèl e l ap tann ekskiz piblik bò kote gouvènman kanadyen.