Konplis Gérard Latortue kenbe li nan manti !

Dapre yon nòt ansyen minis defakto Kilti ak Kominikasyon an, Magalie Comeau Denis fè soti sou dosye pwospeksyon anba lanmè nan Ilavach, nan depatman Sid la, Premye minis defakto a, Gérard Latortue te prezan nan moman yo t ap siyen kontra a ak konpayi « SubSea Research», 27 out 2004. Kontra sa a te siyen nan sal konferans ministè Ekonomi ak Finans e se minis Ekonomi ak Finans lan, Henri Bazin, minis Kilti ak Kominikasyon, Magalie Comeau Denis, ki te siyen l an prezans Premye minis defakto a, Gérard Latortue, minis Komès ak Endistri a e Touris la, nan epòk la, Daniele Saint-Lot, avoka konpayi a, Gervais Charles e reprezantan konpayi Sub Sea research Carribean Marine Institut, Christopher John Lea Russon e Douglas D. Chrozianin, direktè kabinè minis Finans lan, Guy Bernadin te la tou.

            Nouvo kontra sa a te elimine yon premye kontra menm konpayi sa a te siyen avèk gouvènman Jean-Bertrand Aristide la nan ane 2003 e konpayi a te pran angajman pou fè pwospeksyon, rechèch e eksplwatasyon sibakwatik nan zòn Ilavach.

            Kodirektè konpayi a, Greg Brooks akize gouvènman defakto Alexandre/Latortue a de koripsyon, de konplisite, de vòl de kanon ak lòt objè enpòtan. Nan yon deklarasyon li te fè 27 avril la, Greg Brooks fè konnen nan mwa novanm 2005, yo vòlè 6 kanon an bwonz ak plizyè pyès an lò e emerod nan sit la nan Ilavach ke yo transpòte yo Panama anvan yo voye yo Kanada.

Prezidan Preval rankontre direktè medya

Madi 9 me a, prezidan René Préval te rankontre responsab plizyè medya, pou pale sou priyorite  li yo lè l fin envesti 14 me a. Li fè konnen se konsètasyon ak tout sektè yo k ap pèmèt Ayiti debloke nan sitiyasyon difisil sa a. Li envite laprès pou rejwenn li nan yon mouvman konsètasyon jeneral, pou l mete kanpe yon ajenda nasyonal pou 12 premye mwa prezidans li a.

            Objektif rankont li ak laprès se te kontinye eksplike demach li antreprann lan ki se konsètasyon ak api enstitisyon piblik yo pou yo kapab defini yon ajenda nasyonal pou mete ala dispozisyon pwochen gouvènman an.

            Prezidan Preval te pale sou misyon nouvo palman an e li envite laprès pou apiye palmantè yo nan travay yo, e li te fè bilan plizyè rankont li te fè ak plizyè Chèf Leta nan Amerik di Sid la ak Karayib la sou koperasyon yo avèk Ayiti. Li te site kèk peyi kou wè, Ajantin, Brezil e Chili, yo pwomèt y ap ede l nan plizyè domèn. Li te pale sou vizit li te fè nan Kiba ak Venezuela, e Venezuela entegre Ayiti nan Petwokaribe a e li pwomèt depi prezidan Preval fin pran pouvwa a, l ap voye gaz la ann Ayiti.

Etidyan yo pote plent kont defakto yo

Gwoup Refleksyon ak rechèch inivèsite pou devlopman (GREUDI) e Inyon etidyan inivèsitè konsète ayisyen (UNICEH) manifeste pou yo depoze yon plent kont otorite defakto yo devan Chanm depite a ak Sena a. Etidyan yo ap mande palmantè yo pou yo mennen yon ankèt sou jesyon otorite defakto yo pou yo kapab idantifye epi arete tout moun ki koupab de malvèsasyon. Yo akize rejim defakto ki pat respekte lalwa, vyolasyon dwa moun e koripsyon, tolere enpinite, lè l fè libere moun ki te kondane, ki te akize nan enplikasyon krim dokimante, e mete nan prizon tout opozan politik li yo.

            Kòdonatè jeneral GREUDI a, Jean Gédéon e sekretè jeneral UNICEH la, Apollon Renelsond fè konnen otorite defakto yo dwe rann kont sou jesyon yo pandan 2 ane yo pase sou pouvwa a. Pòtpawòl òganizasyon yo site kèk kontra ilegal defakto yo te siyen kouwè: Kontra gouvènman defakto a te siyen avèk yon konpayi etranjè pou eksplwatasyon fon lanmè; arete prezidansyèl nan dat 9 desanm 2005 ki te revoke 5 jij nan kou kasasyon; akò Latortue ak Minustah pou mete polis nasyonal la sou titèl Minustah.

            Pou tout zak ilegal sa yo etidyan yo pral depoze yon plent devan chanm depite a, pou l ka mete responsab defakto yo ann akizasyon epi sena a pral erije l an wòt kou de jistis pou jije yo.

Grèv nan Fakilte Syanszimèn

Depi vandredi 5 me a, etidyan fakilte Syanszimèn yo, youn nan 11 fakilte nan Inivèsite Leta (UEH) a, ap obsève yon grèv nan lokal enstitisyon an pou pwoteste kont move jesyon ak fonksyonman fakilte a. Daprè etidyan yo, konsèy ki te eli depi 9 mwa pa fè anyen pou amelyore kondisyon yo. Depi 5 me a tout aktivite yo bloke nan fakilte a. Yo mobilize e mete yo dakò sou lis revandikasyon sa yo: reyabilitasyon twalèt yo, pwoblèm elektrisite a, ogmante kantite òdinatè e agrandi laboratwa enfòmatik la, etidyan dwe genyen aksè nan sèvis fotokopi a ak enpresyon an pou pipiti lajan. Etidyan yo fè konnen y ap rete mobilize jiskaske responsab yo satisfè revandikasyon yo.

Nouvo platfòm òganizasyon peyizan

6 òganizasyon peyizan k ap travay nan plizyè depatman  kouwè Latibonit, Nò, Nòdwès, Lwès ak Grandans deside kreye yon platfòm ki rele Kòdinasyon nasyonal revandikasyon peyizan Ayisyen yo (Konarepa) ki ap genyen ladan l: Inyon ti peyizan ayisyen (Tèt kole), Federasyon peyizan patizan Mackandal (Feppam), Federasyon gwoupman peyizan Bèlfontèn (FGPB), Mouvman revandikatif peyizan san tè (MRPST), Kòdinasyon defans enterè peyizan yo (KODEP), e Kòdinasyon militan pou devlopman (CMD). Objektif kòdinasyon an se chache solisyon ki korèk pou sektè peyizan an: rebwasman, refòm agrè pou ògmante pwodiksyon nasyonal la, sistèm irigasyon fyab, wout nan seksyon kominal yo, desantralizasyon sèvis sosyal yo, refòm nan aparèy jidisyè, elatriye.

            Kòdinasyon sa a ki te prezante l bay piblik la jedi 4 me a, fè konnen li prè pou l travay ak lòt òganizasyon peyizàn pou fè pase revandikasyon yo. Responsab Konarepa deklare yo pa nan okenn pati politik, men y ap travay pou fè respekte revandikasyon peyizan yo.

Rezilta resansman

Mèkredi 10 me a, Enstiti ayisyen statistik e enfòmatik (IHSI) prezante rezilta definitif katriyèm resansman popilasyon ak abita nan lotèl Karibe Convention Center. Daprè dokiman an, an Ayiti genyen 8 milyon 373 mil 750 abitan, e ki genyen yon tandans pou l ògmante a 10 milyon nan ane 2010. Genyen 59,2 pou san nan popilasyon an  k ap viv nan milye riral, depatman Lwès la genyen 37 pou san, Latibonit 16 pou san e depatman Nò 10 pou san. Fanm yo reprezante 52 pou san, moun ki genyen 65 lane e plis reprezante 5.1 pou san. Resansman sa a ki te reyalize nan lane 2003 montre ke Ayiti genyen yon popilasyon ki pi jèn nan tout Lamerik la avèk 50 pou san moun ki aje de mwens 20 lane.

            Se minis defakto Ekonomi ak Finans lan, Henri Bazin ki te dirije seremoni an ki te dewoule an prezans reprezantan Fon Nasyonzini pou popilasyon, (UNFPA) Hernando Clavijo ; direktè IHSI a, Evens Joseph, direktè biwo resansman an, Renand Dorélien e plizyè kad nan administrasyon piblik la. Se Inyon ewopeyèn Unfpa, BID, Japon e rejyon Wallone nan Beljik ki te finanse resansman sa a.

Arestasyon 2 polisye nan Pòdepè

Responsab Polis nasyonal yo nan depatman Nòdwès la arete 2 polisye, enspektè Charles François e komisè Hervé Bastien pou enplikasyon yo nan trafik dwòg. Pou kounye a 2 mesye sa yo twouve yo nan izolman nan kapital la. Dapre deklarasyon enspektè Charles François, li kalifye arestasyon li an kòm yon kidnaping, e li akize direktè depatmantal polis Nòdwès la, Nicolas Dalbert Prato kòm yon dilè dwòg epi ki toujou kanpe ankwa pou lapolis pa fè arestasyon dilè dwòg yo nan vil Pòdepè.

Inyon ewopeyèn anonse yon èd de 294 milyon ewo

Prezidan komisyon ewopeyèn lan, José Manuel Barroso anonse mèkredi 10 me nan Bruxelles yon èd de 294 milyon ewo pou Ayiti. Avèk èd sa a Inyon ewopeyèn konfime pozisyon l nan tèt lis bayè fon pou Ayiti. José Manuel Barroso fè anons sa a 2 jou avan louvèti somè Ewop – Amerik Latin – Karayib la ki t ap fèt Vyèn nan Otrich. Li swete pwosesis chanjman ki demare avèk eleksyon 7 fevriye 2006 la nan peyi Dayiti kontinye. Li montre li satisfè pou fason eleksyon prezidansyèl ak lejislativ yo te dewoule an Ayiti.