Bolivi rejwenn Kiba e Venezyela nan batay kont ZLEA a

Prezidan bolivyen an, Evo Morales siyen akò pou l rejwenn Kiba e Venezyela nan Altènativ Bolivaryèn pou Amerik la (ALBA) ke prezidan venezyelyen an, Hugo Chavez te lanse kòm altènativ a zòn lib echanj ann Amerik (ZLEA) enperyalis meriken vle peyi nan amerik la siyen ak li. Nan okazyon selebrasyon premye anivèsè ALBA, 27 avril ki sot pase a, plizyè milye moun te patisipe nan yon gwo rasanbleman sou plas Revolisyon an, nan kè kapital kibèn lan, nan la Havane, an prezans 3 lidè istorik nan Amerik la ; Fidel Castro, Hugo Chavez e Evo Morales.

            Evo Morales te pran lapawòl pou felisite pwojè ALBA a e remèsye gouvènman kiben an poutèt li elaji operasyon mirak ki deja trete 7 mil bolivyen ki te malad nan zye. Li deklare « Bolivi, peyi devaste ekonomikman, ap eseye rekipere resous natirèl li yo, ranplase neyoliberalis la, refonde nasyon an, kote yo te mete deyò vrè pèp la, pou sa fèt nou konvoke yon Asanble konstitiyant.» Hugo Chavez bò kote pa l, fè Bolivi konnen, li mèt konte sou li pou l ka rekipere resous li yo, li anonse li pral l ogmante kredi li konn bay Bolivi a 100 milyon dola.

Ayiti antre nan Petwokaribe a

Madi 2 me a yon delegasyon venezyelyen ak kiben te rive nan Pòtoprens nan demach k ap fèt pou entegre Ayiti nan pwogram Petwokaribe prezidan venezyelyen an, Hugo Chavez mete kanpe pou vann gaz a yon pi ba pri bay peyi yo nan Karayib la. Ansyen premye minis lan Jacques Edouard Alexis ki te fè anons lan, fè konnen preparatif ap vanse byen pou prezidan René Préval kapab siyen akò a lendi 15 me a, yon jou apre envestiti l.

            Dapre Alexis, travay delegasyon an deja temwanye volonte prezidan venezyelyen an, Hugo Chavez pou fasilite entegrasyon Ayiti nan pwogram sa a. Men Alexis t ap di tou ke: «Se pa yon don ni yon sibvansyon, men yon kontra k ap bay Ayiti posibilite pou l peye sou yon peryòd 25 lane».

60 milyon pèdi pou peyi a

Visrektè pou afè akademik nan Inivèsite Leta Ayiti (UEH), Wilson Laleau fè konnen jou 3 me a, sou wòl inivèsite nan devlopman sosyoekonomik, sou lèzond Radyo Solidarite, genyen plis pase 60 milyon dola ki ale an Repiblik Dominikèn pou finanse etid ayisyen yo chak ane. Li kalifye sitiyasyon sa a de eskandal, pandan li raple bidjè inivèsite Leta Ayiti fikse a 277 milyon goud, ki pipiti ke 8 milyon dola. Dapre vis rektè a genyen 12 mil etidyan ayisyen an Repiblik dominikèn, ki reprezante mwatye efektif inivèsite Leta a. Po

            Dapre kèk temwanyaj Ajans ayisyen près jwenn, etidyan ayisyen yo pati kite peyi a pou al etidye an Repiblik Dominikèn nan dènye ane sa a, pou plizyè rezon : degradasyon anviwonman sekiritè e movè kalite ansèyman inivèsite ayisyen yo. 

Fondasyon 30 septanm mande jistis pou viktim yo

Mèkredi 26 avril pase a, Fondasyon 30 septanm te òganize yon mobilizasyon sou plas Mati yo, sou Channmas la pou mande jistis pou tout moun ki te viktim, soti 26 avril 1987 pou rive jounen jodi a. Madanm Yvon Antoine, Kemlie yon manm Kolektif fanmi prizonye politik yo ki t ap patisipe nan mobilizasyon sa a mande liberasyon tout prizonye politik yo avan envestiti prezidan eli a, René Préval 14 me k ap vini an.

            Kemlie fè konnen jounen jodi a, Kolektif GDP fanmi prizonye politik yo, yo kanpe la a avèk Fondasyon 30 septanm pou yo frape kont gouvènman san manman sa a, kont gouvènman zago loray sa a, ki kenbe yon bann sitwayen nan prizon pou opinyon politik yo pandan 2 lane. Li denonse òdonans ranvwa jij Mimose Janvier te fè soti pou voye Annette Auguste alyas Sò Ann ak Yvon Antoine alyas Yvon Zapzap devan yon tribinal. Li denonse gwoup 184 la ak doktè Boulos k ap fè konplo pou yo ka kenbe pitit pèp la nan prizon pou konviksyon politik yo.

Ansanm ansanm nou se Lavalas!

Mouvman elaji Lavalas (MOEL), nan yon konferans près mèkredi 26 avril la, felisite popilasyon an ki te fè deplasman al vote kandida Lespwa ak Fanmi Lavalas yo nan dezyèm tou eleksyon yo, vandredi 21 avril la. Pòtpawòl MOEL la, Luckner Jabrun ankouraje tout sektè politik yo kolabore avèk nouvo gouvènman prezidan Preval pral mete kanpe a, pou yo ka rive retire peyi a nan sitiyasyon li twouve l apre 2 ane jesyon defakto yo. Li deklare: « MOEL apresye detèminasyon ak volonte pèp la, lè l te konprann e adopte konsiy avèk modòd MOEL te ba yo pou al vote tout kandida Lespwa avèk Fanmi Lavalas yo, paske nou rekonèt ansanm ansanm nou se Lavalas. Ke l te Lespwa, ke l te Fanmi Lavalas, nou tout se Lavalas. E n ap profite okazyon sila a pou n di ansanm de palmantè sa yo, ke l te Lavalas, ke l te lòt pati politik, nou anfas yon defi jounen jodi a ; defi kote peyi a fizikman l ap depafini, kote sosyalman l ap degrade.»

Sekretè jeneral CTH la denonse defakto yo

Sekretè jeneral adjwen konfederasyon Travayè ayisyen yo (CTH), Jacques Belzin denonse briganday rejim defakto Alexandre/Latortue a fè nan peyi a pandan 2 lane jesyon yo. Li mande respè dat 8 me a pou 48tyèm lejislati a antre an fonksyon e 14 me pou prezidan eli a pran envestiti l pou al travay pou amelyore kondisyon lavi popilasyon an. Li fè konnen yonn nan pi gwo fado rejim defakto kite kòm eritaj pou pwochen gouvènman konstitisyonèl la, se dosye lajistis la. Pami pil ak pakèt dezòd defakto yo fè, Jacques Belzin site: dosye prizonye politik yo, dosye lakou kasasyon, nominasyon nan konsèy siperyè majistra yo, siyati kontra pou chache pwodui presye anba lanmè, akò Latòti siyen ak Nasyonzini pou mete polis nasyonal la sou titèl Minustah, pil ak pakèt nominasyon k ap fèt san gade dèyè nan reprezantasyon ayisyen yo nan peyi etranje ak nan administrasyon piblik yo. Tout bagay sa yo reprezante yon pyèj pou prezidan René Préval ki pral pran direksyon peyi a 14 me k ap vini la a.

Wa Allada nan peyi Benin rann Tousen Louvèti omaj

Nan peyi Benin, nan okazyon 203zyèm anivèsè lanmò François Dominique Toussaint Breda, yo te rele Toussaint Louverture, Wa Allada a te òganize yon seremoni pou rann Toussaint Louverture yon gwo omaj. Seremoni sa a te dewoule a Allada, yon lye istorik ki sitiye a 50 kilomèt de Kotonou, an prezans plizyè pèsonalite beninwaz, ayisyen e lot etranje, manm kò diplomatik la e reprezantant anbasad Ayiti a nan peyi Benin. Yo te fè rapèl sou lavi Toussaint Louverture ki se te pitit premye wa Allada, Deguenon Gahou kolon blan yo te pote vin lage ann Ayiti. Yo rekonèt Toussaint Louverture kòm papa endepandans ayisyèn lan, ki te mennen yon batay pou libere esklav nwa yo. Li te mouri nan yon prizon an Frans 7 avril 1803.

1200 nouvo sòlda brezilyen ap rive

Ajans brezilyèn lan, Agencia Brasil, fè konnen genyen 1200 sòlda brezilyen ki kite Brezil lendi premye me a,  e ki genyen pou rive Ayiti nan 30 jou pou vin fè wotasyon pou twoup Brezil ki deja nan Minustah ann Ayiti yo.

            Dapre chèf kominikasyon twoup brezilyen yo nan Minustah, lyetnan kolonèl, Fernando Mattos, se ensekirite ak vyolans yo ki jistifye prezans sòlda brezilyen yo. Li fè remake kantite kidnapin yo kite 167 chak mwa jiska desanm 2005 pase a 6 nan mwa avril 2006 la e genyen yon sitiyasyon trè kalm nan peyi a depi apre eleksyon ki te pote René Préval prezidan.

            N ap raple se Brezil ki gen kòmandman militè Minustah a ki genyen 6 mil 200 militè ki soti nan 20 peyi.

Se football oubyen lajan ki kab bloke eleksyon kolektivite yo?

Eleksyon minisipal e lokal yo konsèy elektoral pwovizwa (KEP) a te prevwa fè dimanch 18 jen an kapab ranvwaye poutèt match Brezil ak Ostrali k ap jwe jou sa a nan mondyal foutbòl 2006 la, ann Almay. Sekretè jeneral KEP la, Rosemond Pradel te deklare vandredi 28 avril la: «Pèp ayisyen renmen anpil foutbòl e yo di nou ke sitwayen ak sitwayèn pap soti pou al vote 18 jen an. Paramèt a nou pap kapab inyore l». Direktè jeneral KEP la, Jacques Bernard bò kote pa l fè konnen KEP la poko jwenn lajan pou fè eleksyon kolektivite yo.

Anpil pale anpil sou kestyon migrasyon

Chanselye dominiken an Carlos Morales Troncoso fè konnen nan Washington jou 2 me a, otorite ayisyen ak dominiken yo ap travay ansanm pou yo wè si yo ta jwenn yon solisyon nan pwoblèm san papye ayisyen yo k ap viv sou teritwa dominiken an. Dapre ajans dominiken, Chanselye a fè deklarasyon sa a pandan l t ap patisipe nan yon fowòm ki rele: «Rechèch de baz komin nan refòm migratwa nan peyi Etazini». Pou sèlman mwa avril la, Dominiken yo rapatriye 2 mil 500 ayisyen.

Ki kalte pri sa a Prezidan Fernandez ap resevwa!

Prezidan dominiken an, Leonel Fernandez, anonse samdi 29 avril pase a, gwo pwoblèm sekirite ki genyen sou fwontyè a pral jwenn yon solisyon avèk ekzekisyon yon plan ki te prepare ansanm ant Ayiti, Repiblik Dominikèn, Etazini e Ewop. Dapre Leonel Fernandez plan sekirite sa a pral konbat tout trafik ilegal k ap fèt sou fwontyè kou wè: trafik dwòg, kontrebann k ap agrave sitiyasyon an sou fwontyè a. Prezidan Fernandez te fè deklarasyon sa a, pandan l t ap patisipe nan yon dine nan lotèl Hilton nan Santo Domengo, kote l re resevwa pri entèamerik lidèchip 2006, Fondasyon Panameriken pou devlopman (PADF). Li resevwa pri sa a, pou kontribisyon l nan ranfòsman sosyete a e amelyorasyon pèfòmans ekonomik Repiblik Dominikèn.  Se pa dwe pou sa yo ba li pri sa a, paske pandanstan pèp dominiken ap pwoteste pou solda ameriken ki twouve yo enstale ko yo nan Barahona!

Fwa agrikol sou Channmas

Nan okazyon fèt agrikilti e travay premye me a, Ministè Agrikilti defakto a te òganize yon fwa agrikòl sou Channmas la, 29 e 30 avril sou tèm: « Ann bay pwodiksyon nasyonal la valè ». Yonn nan òganizatè yo, Wilson Durand fè konnen se te yon reyisit pou yo, paske yo te rive mobilize plizyè milye moun, pami yo 200 ekspozan ki soti nan diferan sektè nan peyi a.