Arestasyon Raphaël Boulos pou kontrebann

Mèkredi 12 avril la, polisye yo ak dwanye sou fwontyè a, nan Malpas te prezante bay laprès 96 baril metanòl e 240 baril etanòl yo te sezi. Moun ki mèt produi sa yo se yon seri kontrebandye ki te itilize lak Azueyi ant Ayiti ak Repiblik Dominikèn pou antre ak pwodui sa yo ki ta dwe genyen yon otorizasyon espesyal plizyè ministè.

            Direktè jeneral PNH la, Mario Andresol te deklare lè sa a: « Li lè, li tan pou jan daksyon sa yo sispann nan peyi a; kèlkeswa moun li ye, y ap arete yo e remèt yo bay otorite jidisyè pou suit legal.»

            Choz di choz fèt, parètil, lendi 17 avril la, lapolis arete yon komèsan ayiysen, Raphaël Boulos ak 3 lòt moun. Aprè sa, lapolis te al fouye yon antrepriz Boulos la e yo te jwenn menm pwodui sa yo. Pòtpawòl PNH la, Frantz Lerebours te deklare: «Raphaël Boulos e 3 lòt moun sa yo ap reponn kesyon lapolis kounye a e y ap voye yo devan lajistis pou yo bay esplikasyon sou zak yo repwoche yo.» Antouka nou mèt si e sèten Raphaël Boulos p ap rete nan prizon lontan e tout bagay pral efase byen vit.

Lopital yo nan menm eta ak wout yo!

Prezidan Federasyon ayisyèn foutbòl la, Yves Jean Bart ki t al vizite jwè foutbòl ekip Dinamik Senmak ki te fè aksidan sou Wout Nò a, pandan yo t ap sot jwe yon match Kap ayisyen 16 avril la. Doktè Jean Bart fè konnen se yon wont pou wè nan ki eta lopital la twouve l, sitiyasyon sa a mete lavi viktim aksidan yo plis an danje, e li te deklare: «Eta wout  yo pa bon, gade eta yon lopital depatmantal nan yon vil, kòm Site Endepandans lan!. E poutan jan Gérard Latortue ap vante jan li ranje wout, jan li bati lekol!

PNH fè bilan dezyèm tou eleksyon yo

Pòtpawòl polis nasyonal la, komisè Frantz Lerebours drese yon bilan pou dezyèm tou eleksyon lejislativ 21 avril la. Li fè konnen nan komin Vèrèt nan Latibonit biwo yo te fèmen avan lè, kote yon kandida pou depite, Dorson Jean Beauvoir te ouvè kout zam sou elektè epi blese yon obsèvatè nasyonal. Sitiyasyon sa a te pwovoke yon gwo panik nan zòn lan, responsab PNH yo te sètoblije pran kèk dispozisyon. Genyen yon polisye ki blese nan lekòl nasyonal ti Plas Kazo nan kapital la e genyen yon polisye 14zyèm pwomosyon ki te jwenn arestasyon l nan depatman Nòdwès la, se sòlda Minustah yo ki te arete l ak gwo zam nan men l. Lapolis arete plis pase yon santèn moun nan diferan rejyon jou eleksyon yo.

            Frantz Lerebours fè konnen ajan PNH yo arete plis pase yon santèn moun nan zòn metropolitèn lan pou tantativ asasina, kidnapin, abid konfyans e kanbriyolaj.

Depòtasyon Ayisyen

Otorite dominiken rapatriye 180 ayisyen 26 avril la, aprè yo te fin arete yo nan nò peyi a. Se enspektè imigrasyon ak militè dominiken yo ki te arete yo nan diferant lokalite.

            Kòdonatè Oganizasyon Solidarite Fwontalyè nan Dajabon, nan nòdwès Repiblik Dominikèn, Regino Martinez fè konnen se pa rapatriman fòse a k ap rezoud pwoblèm imigrasyon ayisyen yo. Dapre Regino Martinez, se otorite dominikèn yo ki dwe fè yon fason pou ranfòse sistèm kontwòl vwayaje e mete fen ak tout koripsyon ki genyen sou fwontyè a, kote militè dominiken ap pran lajan pou kite moun pase. Depi lane 2006 la kòmanse, yo raptriye plis pase 10 mil Ayisyen, dapre lame dominiken an.

Depòtasyon 138 Dominiken

Jounal dominiken El Viajero anonse mèkredi 19 avril la depòtasyon 138 resòtisan dominiken ki te rive ilegal nan plizyè zil nan Karayib la tankou: La Dominik, Kiraso, Matinik e Awouba. Pi fò nan yo se fanm, ki t al rann tèt yo volontèman bay otorite imigrasyon yo pou retounen yo nan peyi yo pou yo te echape anba eksplwatasyon seksyèl nan peyi sa yo kote yo menm ap frape yo pou fè yo aksepte travay nan bòdèl yo.

Latortue ap ransone chofè piblik yo!

Federasyon transpòtè piblik ayisyen kritike gouvènman defakto Alexandre/Latortue a k ap fè chofè yo monte lesyèl pa do nan Ofis asirans veyikil (OAVCT) ak direksyon jeneral enpo (DGI). Nan OAVCT prim asirans lan ki te 495 goud nan lane 2000 pase a 2 mil 500 goud pou rive kounye a 7 mil 500 goud. Sa k pi rèd la, yon machin te mèt fè 5 lane, 10 lane kanpe e li anpàn w ap peye tout lajan an kanmenm dapre yon nòt OAVCT fè soti.

            Nan DGI, yo elimine kat idantite a, yo ranplase l pa yon matrikil fiskal, men yo fè moun peye tout aryere yo te dwe. Men pou kounye a, chofè ak pwopriyetè machin yo pa ka jwenn matrikil fiskal la, sa fè chofè yo pa ka jwenn lisans ak plak pou yo sikile. DGI fèmen pou chofè ak pwopriyetè machin.

Anivèsè vil Senmak

Madi 25 avril la, vil Senmak t ap fete 311zyèm anivèsè li. Nan okazyon sa a yon mès te chante nan legliz pawasyal la, yo te fè plizyè aktivite kiltirèl nan vil la. Plizyè sitwayen k ap viv aletranje te rantre vin fete, yo manifeste volonte yo pou yo ede nan devlopman zòn lan, men yo kritike responsab yo ki pa fè anyen pou vil la. Prezidan komisyon kominal la, Thompson Charliénord bo pa li akize gouvènman defakto a:  «Yo repwoche nou pou mank kolaborasyon, men pa genyen moun ki ka fòse nou patisipe nan zak koripsyon .» Li fè konnen, li espere nouvo gouvènman pral ede nan devlopman vil Senmak.

Préval lanse yon apèl bay 48tyèm lejislati a

Prezidan eli a, René Préval lanse yon apèl bay 48tyèm Lejislati a, nan kèlkeswa pati yo soti, pou yo fè prèv bòn fwa, pou al travay pou yo chache amelyore kondisyon vi popilasyon an. Li fè palmantè yo konnen yo genyen yon gwo wòl pou yo jwe nan fòmasyon gouvènman an, nan vote bidjè a e nan kontwole gouvènman an e ke platfòm politik li a pa genyen pretansyon e resous pou debloke sitiyasyon difisil peyi Dayiti. Se pou sa li deja chita pale ak plizyè dirijan politik.