Dezyèm vizit Preval nan Dabòn

Avan l te pati pou Kiba, prezidan eli a, René Préval, te fè yon dezyèm vizit madi 11 avril la, nan izin Sikriyè Dabòn lan, nan Leyogàn pou l te pran enfòmasyon kouman izin lan ap mache apre enstalasyon nouvo konsèy administrasyon an. René Préval te genyen avèk li, anbasadè brezilyen an Andrade Paolo Pinto; reprezantan adjwen sekretè jeneral Nasyonzini an ann Ayiti, Larry Rossin e minis defakto Agrikilti a, Philippe Mathieu. Yo chak bò kote pa yo te felisite prezidan Préval sou fason li abòde dosye izin lan.

            Prezidan Preval bò kote pa l, te felisite teknisyen kiben ak ayisyen pou jefò y ap fè pou izin lan rekòmanse fonksyone e li mande responsab nouvèl administrasyon an ranmase tout doleyans plantè yo ak tout moun k ap travay nan izin lan, pou yo kapab twouve solisyon pou tout pwoblèm ki anpeche izin lan mache byen.

Prezidan Preval fè bilan vizit li nan Kiba

Prezidan eli a, René Préval rantre ann Ayiti madi 18 avril la sòti Kiba, kote l te pase 6 jou. Préval anonse yon gwoup teknisyen kiben k ap vin ede Ayiti pou etidye pwodiksyon enèji, e ke Ayiti pra l antre nan Petwokaribe a prezidan Venezyela a, Hugo Chavez te deja ofri Ayiti.

            Prezidan Preval ki te montre l trè satisfè sou vizit li Kiba anonse tou ke otorite kiben yo pwomèt li yon kouvèti medikal ki pral touche 55 lot komin nan peyi a avèk arive yon lòt kontenjan doktè kiben. Èd kibeen an pou Ayiti ap genyen pou kouvri plizyè lòt domèn.

            Delegasyon prezidansyèl la te genyen yon ventèn moun, pami yo te genyen : minis agrikilti defakto a, Philippe Mathieu; ansyen minis agrikilti a, François Séverin ; ansyen sekretè Deta sekirite piblik la, Robert Manuel ak plizyè mizisyen k ap soutni platfòm Lespwa a.

Jacques Edouard Alexis al apiye kandida Lespwa yo

Pandan absans prezidan Préval, ansyen premye minis e responsab platfòm politik Lespwa a, t al fè kanpay pou kandida Lespwa yo, nan Jakmèl ak Gonayiv. Li te deklare: «N ap mande popilasyon an mobilize l, leve bonè, menm si gen difikilte, menm jan 7 fevriye a, ebyen leve pou nou al vote tout kandida Lespwa yo, 3 fèy la, Lespwa #1»

            Nan Jakmèl, Jacques Edouard Alexis te mande kandida Lespwa yo, pou yo mete tèt yo ansanm.

Hugo Chavez denonse Etazini

Prezidan venezyelyen an Hugo Chavez denonse madi 18 avril la, plizyè entèvansyon militè Etazini te fè nan plizyè peyi nan Amerik Latin lan. Chavez deklare: «Kounye a Etazini ap pale de yon estrateji de sekirite e li pale de yon lagè prevantiv epi li fè konnen li gen dwa pou l entèvni ak lafòs nan nenpòt peyi. Bò kote pa nou, nou pral konbat enperyalis Washintonn lan .» Prezidan Chavez fè konnen Etazini kòmanse ap fè kèk manèv nan Venezyela menm, se yon menas kont Venezyela, men yon menas kont Kiba tou.

2 aksidan sou wout Nasyonal #1 an

Pandan wikenn paskal la, genyen 2 aksidan machin fèt sou wout Nasyonal #1 an. Genyen yonn ki te fèt nan zòn Pilbowo, dimanch swa 16 avril la, lè yon otobis ki t ap transpòte ekip foutbòl Dynamit Senmak la ki t ap sot jwe yon match KapAyisyen. Otobis la te genyen 34 moun, li tonbe nan yon ravin, 3 moun mouri e yon ventèn lòt blese. Visprezidan federasyon foutbòl la, Julio Cadet te konfime enfòmasyon sa a, e li te anonse genyen yon delegasyon federasyon an, ki gen nan tèt li prezidan federasyon an, Yves Jean Bart, ki ale Gonayiv ak Enri kote aksidan an te fèt.

            Lòt aksidan an te fèt nan zòn Ponsonde samdi 15 avril la, yon kamyon HL konstriksyon te pèdi fren al antre nan yon bann rara. Bilan aksidan sa a, 6 moun mouri e plizyè lòt blese, ke yo te transpòte blese yo nan lopital Senmak la.

Repiblik Dominikèn rapatriye plis pase mil 1200 ayisyen

Soti 2 mas pou rive 13 avril, sèvis imigrasyon dominiken rapatriye plis pase 1200 ayisyen. Pami yo genyen yon fanm ansent, plizyè jèn k ap etidye nan plizyè fakilte an Repiblik Dominikèn. Kòdonatè rejyonal ofis nasyonal migrasyon (ONM), Enock Hérard fè konnen Repiblik Dominikèn voye ayisyen sa yo retounen san yo pa gentan pran afè yo. Dapre kòdonatè ONM lan pi fò nan moun sa yo soti Gonayiv ak Wanament e li fè konnen Ofis la pa genyen ase mwayen finansye pou l ede rapatriye yo.

Mario Joseph depoze yon plent kont Ramikòsm

Vandredi 7 avril la, Mario Joseph, avoka k ap defann viktim Lavalas yo te depoze plent kont plizyè moun ki te enplike nan masak kont patizan Lavalas apre koudeta 29 fevriye 2004 la. Li depoze plent sa yo kont plizyè manm Ramikòsm, yon òganizasyon kriminèl ki t ap goumen kont prezidan Aristide nan konplisite ak gwoup 184 lan nan vil Senmak. Mario Joseph te bay kèk esplikasyon: «Se de moun tout moun konnen nan Senmak, manm Ramikosm yo lè yo t ap fè ekzaksyyon sa yo, vyolans de dwa moun sa yo, yo te fè l sou zye tout moun.»

Inibank kreye yon fondasyon

Madi 18 avril la, Inibank te rele laprès pou mete l okouran de yon fondasyon li kreye ki rele « Fondasyon Unibank ». Fondasyon sa a genyen yon kapital de 100 milyon goud ki soti sèlman nan pwofi aksyonè yo. Fondasyon an pral bay plis enpòtans a edikasyon,  rechèch, espò ak kilti e tout lòt pwojè ki vize pou pwoteje anviwonnman. Fondasyon an ap pote kontribisyon l bay tout efò k ap fèt pou devlope antrepriz nan peyi Dayiti, e k ap fasilite konstriksyon kay pou kouch moun defavorize yo. Dapre prezidan Inibank lan, Carl Braun, pou fondasyon an atenn objektif li yo l ap genyen pou l travay avèk enstitisyon nasyonal ak entènasyonal yo.

Michaëlle Jean ka vin asiste envestiti Preval

Gouvènè jeneral Kanada a, ki genyen orijin ayisyèn Michaëlle Jean kapab vin asiste seremoni envestiti prezidan René Préval, k ap genyen pou fèt dimanch 14 me. Responsab yo nan rezidans ofisyèl gouvènè a nan Ottawa ap planifye tout detay vizit la ki kapab dire plizyè jou.

Tout polisye dwe pote badj yo

Nan kad travay refòm k ap fèt nan polis nasyonal la, direktè jeneral PNH la, Mario Andresol anonse tout polisye dwe pote badj yo tout kote. Dapre Mario Andresol:  «Yon polisye ki pa pote badj li, pa polisye. Se yon ekzijans nan kad travay k ap fèt nan PNH pou yo kapab retire move grenn yo e rive kontwole pi byen ajan yo.»

            Mario Andresol te fè deklarasyon sa a nan ayewopò a madi 18 avril la, lè l t al chèche prezidan eli a, René Préval ki t ap soti Kiba.

UE di li pral ogmante èd li

Samdi 15 avril la, responsab direksyon èd pou devlopman nan Inyon Ewopeyèn (UE) te fè yon vizit ann Ayiti. Pandan pasaj li, Manservisi fè konnen Inyon ewopeyèn pral wè si l ta ogmante èd li konn bay Ayiti. Li te deja bloke 200 milyon ewo pou Ayiti. Nan kad vizit li a, Manservisi te rankontre avèk prezidan eli a, René Préval e premye minis defakto a, Gérard Latortue.

Anplwaye meri Site Solèy reklame 35 mwa aryere

Anplwaye sèvis vwari meri Site Solèy la mande minis defakto Enteryè ak Kolektivite teritoryal la, Paul Gustave Magloire ak majistra defakto meri Site Solèy la, Jean Joël Corneille peye yo 35 mwa aryere salè. Yo akize Corneille detounen lajan salè yo pou afè pa li. Sipèvizè sèvis vwari meri a, Antonio Gelin te bay kèk esplikasyon: «Aprè majistra Fritz fin ale, li te dwe nou 14 mwa, apre demach nou fin fè an desanm 2004, 25 desanm 2004, yo ba nou 3 mwa sou 14 mwa, rete 11 mwa, avan yo ba nou li, men Joël Corneille ki premye mè nan Site Solèy aktyèlman la a, misye di, a ti kòb sa a n ap touche a se pa anyen li ye, 200 dola (1000 goud) pa ka fè anyen pou moun yo, li rele kontab la, li di kontab la monte bidjè vwari a pou mwen, travayè 400 dola, (2000 goud), chèf ekip 500 dola (2500 goud), sipèvizè 600 dola (3000 goud).»

            Antouka Gelin fè konnen yo deja ekri minis Enteryè a sou salè yo, li poko janm voye repons ba yo. Anplwaye yo, mande defakto yo peye yo 35 mwa aryere salè yo, paske se malere ak malerez anndan Site Solèy yo k ap ranmase chyen mouri, tout kalite vye bagay santi yo jwenn nan lari. 

Liberasyon 5 prizonye politik

Jij denstriksyon Mimose Janvier, responsab dosye 5 desanm 2003, nan fakilte Syanszimèn, libere 5 prizonye 13 avril la: Harold Sévère, Jacques Anthony Nazaire, Mario Exilhomme, Rospide Pétion ak yon lot.

Ayiti nan lòd di jou reyinyon Karikòm lan

Lendi 24 ak madi 25 avril minis Afè etranjè peyi ki manm Karikòm lan ap reyini nan   Grenade. Dirijan Karikòm yo pral analize dènye devlopman sitiyasyon Ayiti apre premye tou eleksyon 7 fevriye yo ki te pote René Garcia Préval sou pouvwa.  Karikom te koupe relasyon ak Ayiti apre koudeta Etazini, Lafrans, Kanada ak tyoul li yo anndan peyi a te fè sou prezidan konstitisyonèl lan, Jean Bertrand Aristide, 29 fevriye 2004.

Konsèy Saj ta vle jwe yon wòl!

Kòdonatris administratif Konsèy Saj la, Anne Marie Issa, drese yon bilan negatif sou fonksyonman gouvènman defakto Alexandre/Latortue pandan 2 lane li pase sou pouvwa. Li fè konnen li pa aplike yon seri pwen nan akò 4 avril la. Li deklare : « Fè kèk aksyon sosyal onivo peyi a, oke, sekirize peyi a, prepare eleksyon, anfen se tout yon lis, malerezman m pa gen akò a. Men lè m ap gade akò a, m wè pa gen yonn ladan yo ki fèt, e se yonn nan pwoblèm Konsèy Saj la; e m kwè se yonn nan bagay ki fè ke n ap repete lè ke nou panse ki domaj, paske gouvènman tranzisyon an, wòl li se te prepare peyi a sou yon ray pou pwochen gouvènman an ki vini omwen li jwenn, tankou m ta di w, li jwenn  baz la. Men li pa jwenn anyen, li jwenn yon peyi ki fin detwui. Nou panse ke se yon tranzisyon ki rate, oke, e m panse ke gouvènman tranzisyon an se yon vre echèk ».

            Kòdonatris Konsèy saj la fè konnen y ap kontinye prepare dosye yo pou remèt yo bay 48tyèm lejislati a, nan premye seyans travay li, menm lè gouvènman defakto a te retire tout pouvwa Konsèy Saj la te bay tèt li. Li mande tout sektè pou kolabore ak nouvo dirijan peyi a pou rive pote yon amelyorasyon nan kondisyon popilasyon an.

Etidyant enfimyè yo denonse koripsyon minis Bijou

Etidyant lekòl nasyonal enfimyè yo denonse tantativ kòripsyon minis Sante piblik la, Josette Bijou te voye fè sou etidyant yo k ap fè grèv nan lokal ministè a nan Tijo. Se Ariel Henri ki te genyen pou misyon vin kòwonp etidyant yo pandan l te vin ofri yo tout yon seri avantaj li te chache rankontre ak 4 etidyant ki pat genyen manda, anba pou fè yo kèk òf pou eseye detounen revandikasyon etidyant yo ki se fòse minis fè bak sou desizyon l te pran pou fè etidyant yo fè yon ekzamen ki pat nan pwogram akademik yo. Etidyant yo fè konnen y ap okipe lokal ministè a jiskaske minis Bijou fè bak sou desizyon li an.

AIJD mande liberasyon prizonye politik yo!

Biwo asosiyasyon entènasyonal jiris demokrat yo denonse vyolasyon dwa moun an Ayiti e mande rejim defakto a libere tout prizonye politik ak prizonye dopinyon yo k ap mouri nan prizon. Li mande òganizasyon Nasyonzini respekte souverènte peyi a, lè l konsidere apre kidnapin gwo peyi yo te fè sou prezidan Aristide 29 fevriye 2004, li te voye yon fòs okipasyon ki rele tèt li «Misyon Nasyonzini pou stabilizasyon ann Ayiti (MINUSTAH)» ki pa rive jwe misyon lapè jan chat Nasyonzini an e rezolisyon 15-42 a te prevwa l.

            Biwo a fè konnen, menm responsab seksyon dwa moun nan fòs okipasyon Loni an, Minustah, denonse sitiyasyon katastrofik dwa moun nan peyi a e konstate depi enstalasyon gouvènman defakto a apre 29 fevriye 20004, sistèm jidisyè a transfòme an yon veritab machin represyon politik, kote li mache arete tout progresis ak patizan mouvman Lavalas yo e fèmen yo nan prizon san yo pa gen okenn jistifikasyon legal. Tandis ke bandi yo akize pou grav vyolasyon dwa moun, k ap mache fè masak, kidnapin jwenn liberasyon yo fason trè sispèk ak konplisite gouvènman defakto a.

            Donk asosiyasyon entènasyonal jiris demokrat yo ki te reyini nan Kiba 11 ak 12 avril ki sot pase a, reprann rezolisyon asanble jeneral AIJD a, kote l te deja mande liberasyon tout prizonye politik yo an Ayiti avan envestiti prezidan eli a, René Préval. Li mande sekretè jeneral Loni an, Kofy Annan ak Konsèy Sekirite a respekte souverènte e otodetèminasyon pèp ayisyen pou l chwazi libreman dirijan l.

Afè echo sinistre Gonayiv la toujou la

Dapre Jounal Montréal 3 mil recho yo di ki koute 100 mil dola depi 18 mwa nan dwàn Pòtoprens lan. Ladwàn reklame plis pase 10 mil dola kòm frè nan mwa septanm 2005 e plis jou ap pase, plis frè dwàn lan ap ogmante. Recho sa yo se yon ONG nan Montreyal  ODECH ki te pran yon pati lajan Radiothon ki te fèt apre siklon Jeanne pou te achte yo pou voye Gobayiv. Dapre prezidan òganizasyon an, Asma Heurtelou, Premye minis defakto a, Gérard Latortue, pandan vizit li te fè Montreayl apre sa nan Montréal te pwomèt piblikman li pral okipe de dedwany la, men nada marinad, Latortue pa janm respekte pwomès li, li pa fè anyen sou dosye a. Asma Heurtelou fè konnen l ap tann prezidan Préval fin pran envestiti 14 me k ap vini la a, pou l ka rantre nan peyi a pou l vin regle afè sa a. Donk tout kolonn GNBis ta vle se pou nouvo prezidan an regle tout sa konpayèl putchis parèy yo pa t regle pou yo?

Ladwann defakto a fè sa li pito

Depi aprè eleksyon 7 fevriye yo, ladwàn nan peyi Dayiti pran yon seri dispozisyon tèt chaje, se anba anpil monte desann pou rive dedwane kèk koli e yo mande yon pakèt lajan. Menm pwodui k ap ekspire yo rele « perisab » yon moun pa kapab pran ladwàn jou ak lè ouvrab yo. N ap pran kòm ekzanp jounal « Haïti-Progrès » ki konn pase 3 a 4 jou ladwàn e se aprè anpil pale anpil pou n rive jwenn jounal la. Lè w fin ranpli fòmalite ladwàn, yo voye nan Divizyon Trètman Machandiz. Lè w rive nan DTM ou pa ka jwenn dwanye, lè w resi jwenn yon dwanye, yo pa gen blòk resi pou al livre koli yo. Yo di w se sèl administratè ki gen dwa ouvri baz la, si l pa la ou pap jwenn koli a.

Vòl 11 pano solè nan Savanèt

Komin Savanèt pa kapab kominike ak lemond, bandi pote ale 11 pano solè ki te konn fè Teleko fonksyone nan zòn lan, 8 panosolè nan vil la ak 3 nan zòn ka Montas, kote sit Teleko a ye. Depi plizyè jou, sitwayen yo sètoblije mache anviwon 15 kilomèt pou ale sou fwontyè Ayiti/Repiblik Dominikèn lan pou fè yon apèl oubyen mache 24 kilomèt pou ale Mibalè pou yo ka pale ak fanmi yo, paske Teleko pa kapab bay sèvis. Popilasyon an mande direksyon jeneral Teleko nan Pòtoprens pou fè yon efò pou pote yon solisyon pou yo.

Arestasyon yon prezime asasen Mark Bourque

Vandredi 7 avril la, polisye Nasyonzini yo arete yon prezime asasen ansyen polisye Kebèk la, Mark Bourque ki t ap travay nan misyon Loni an ann Ayiti. Lapolis te rive arete l an konpayi 2 lòt kòlèg li pandan yo t ap soti nan yon makèt sou wout Delma a, san yo pa relve non yo. Mark Bourque ki te yon polisye retrete nan jandamri wayal Kanada te jwenn lanmò 20 desanm 2005 nan zòn ayewopò Mayi Gate a. Lapolis te rive arete mesye sa yo, apre enfòmatè te fin idantifye asasen Mark Bourque yo.