Grèv nan prèske tout lopital

Depi plizyè semèn tout aktivite yo bloke nan plizyè lopital nan peyi a, anplwaye yo kanpe travay pou mande minis Sante Piblik la, Josette Bijou peye yo plizyè mwa aryere ak pi bon kondisyon travay. Mouvman grèv sa a gaye nan diferan depatman: Lwès, Nò, Nòdès, Nip, Sant ak Sidès. Nan lopital jeneral, nan kapital la, tout sèvis yo kanpe travay kouwè : ijans, radyoloji, òtopedi, pedyat, laboratwa ak famasi. Move odè ap degaje nan tout kwen lopital la, malad pa ka jwenn swen, yo sètoblije kite lopital la. Prezidan sendika pèsonèl soutyen Lopital jeneral (HUEH) la, Lévy Milot Félix denonse ekip defakto ki nan tèt lopital jeneral la ki pap defann enterè malad k ap frekante lopital la.

Nan Kap Ayisyen, 2 malad deja mouri nan lopital Justinien. Nan lòt lopital yo malad yo ap plenyen anpil pou swen yo pa kapab jwenn, yo lage responsabilite a sou do minis de fakto Sante piblik la, Josette Bijou ki pa janm fè anyen pou rezoud pwoblèm yo.

Ki kote lajan ki debloke pou Gonayiv la pase?

Abitan nan rejyon Gonayiv: Twousab, Asifa, Lòt Bò Kanal pa sispann denonse movè kondisyon sanitè vil la twouve l depi aprè pasaj siklòn Jeanne an septanm 2004. Yo fè konnen, malgrè gwo kantite lajan ki te debloke pou netwaye vil la, fatra ak rès dechè siklòn lan toujou rete anpile nan divès kote nan vil la. Sitiyasyon sa a lakoz plizyè timoun tonbe malad, popilasyon an mande otorite defakto yo pran responsabilite yo. «Men sa pèp la bezwen an, yo menm yo pa janm fè l pou li. Tankou w ap gade avni Léon Legros, lè lapli tonbe se yon zòn ki enpratikab, moun pa ka fè l, tandiske gen moun k ap viv ladan l. Mwen ta renmen mande konsène yo poukisa yo pran moun ki rete nan zòn sa yo, èske moun sa yo se bèt yo ye? Paske chak kòb ki tonbe pou yo fè yon bagay, yo di wi y ap fè l, men tout ranblè yo, yo mete l nan pòch yo, tout adoken nan pòch yo.» E otorite lokal yo fè konnen ke se gouvènman defakto a ki pa ba yo mwayen pou fè pwòpte nan vil la. Sa Latortue ak konpayèl li yo fè ak lajan yo?

Prezidan Préval mande defakto yo libere prizonye politik yo

Pandan vizit li Etazini, prezidan eli a, René Préval mande otorite defakto yo libere tout prizonye politik yo. Daprè prezidan Préval, aparèy jidisyè a se yon enstitisyon ki pi malad nan peyi a. Li te lanse yon apèl bay otorite defakto yo pou l mande yo pran responsabilite yo, libere tout moun k ap kwoupi de fason enjis nan prizon, san lajistis pa jwenn okenn chaj kont yo. Li te deklare: «Aparèy jistis la se youn nan enstitisyon ki pi malad ann Ayiti. Lè mwen rive an pwovens, nan Sid, mwen rankontre avèk manman Mathelier, jou sa a m wè madam lan ap kriye, menm pale m pa t ka pale, tèlman m te santi m angwase devan doulè yon manman, mwen mande aktyèl prezidan, mwen mande Premye minis la, minis Jistis, wè si yo ta fè yon jan pou yo libere moun sa yo lepli vit posib».

Nouvo anbasadè Etazini an ap resite leson li

Nouvo anbasadè Etazini an, Janet Ann Sanderson, nan premyè rankont li ak laprès, mèkredi 12 avril la, nan rezidans prive l, fè konnen Wachintonn manifeste volonte l pou l ranfòse koperasyon nan plizyè domèn kouwè: sekirite, lit kont povrete, lit kont trafik dwòg ak refòm jidisyè epi ranfòse Polis nasyonal la. Daprè anbasadè a Wachintonn deside kontinye apiye pwosesis elektoral la, li ankouraje popilasyon al patisipe nan dezyèm tou eleksyon yo vandredi 21 avril la. Nou ta swete pito pou li ta prevni anplwaye li mete pou dirije KEP la pou li pa rekòmanse menm magouy yo.

Kou siperyè dè kont pral verifye jesyon defakto yo

Nan yon lèt li te voye bay chèf gouvènman defakto a, Gérard Latortue, Kou Siperyè dè kont fè l konnen, l ap vin verifye kouman administrasyon li an te depanse lajan Leta pou peryòd ki sòti mas 2004 a mas 2005. Premye minis defakto a Gérard Latortue ta sanble byen akeyi enfòmasyon sa a, li fè konnen travay sa a rantre nan kad misyon ak atribisyon konstitisyonèl  kou a. De tout fason se sa Latortue montre yo ke yo ap wè.

Yon avyon Caribintair manke kraze

Mèkredi 12 avril la, yon avyon konpayi ayisyèn Caribintair manke kraze sou pis ayewodwòm Jeremi an. Li te genyen 19 pasaje ak ekipay a. Yon kawoutchou tren aterisaj la te eklate, men pa t genyen okenn moun blese, men sanble dapre moun yo se move kondisyon pis la ki lakoz sa.

Latortue vle pran woulib!

Seleksyon Olenpik ayisyèn foutbòl mwen 20 tan an kalifye l pou l patisipe nan faz final Je Santrameriken k ap fèt nan Kolonbi nan mwa jiyè 2006 la. Premye minis defakto a, Gérard Latortue te kouri ap resevwa yon delegasyon seleksyon an nan madi 11 avril la, pou li te pwofite radote aloske mouche pa janm fè anyen pou espò nan peyi a.

Chili ak Brezil ap rete…

Prezidan eli a, René Préval anonse Brezil, Ajantin ak Chili ap voye yon gwoup teknisyen pou vin etidye posibilite pou ede Ayiti sèvi ak etanòl. Prezidan Préval te fè deklarasyon sa a pandan l t ap vizite izin sikriyè Dabòn lan, madi 11 avril la. Daprè anbasadè Brezil la eksperyans sa yo deja pataje ak plizyè lòt peyi kouwè: Etazini ak peyi ewopeyen yo.

Yon lòt kote, prezidan brezilyen an, Luiz Inacio Lula da Silva ak prezidan Chili, Michelle Bachelet pran angajman madi 11 avril la nan Brazilya pou yo kite militè ki yo ki nan Minustah. Michelle Bachelet te deklare: «Nou pa vle fòs militè yo rete pou toutan, men n ap kenbe yo jiskaske otorite demokratik yo ann Ayiti e Loni ap mande nou sa. Prezidan Préval ki eli de fason demokratik te mande nou èd; nou, nou pap refize l. Sa ta pral chanje vokasyon latino-ameriken e karayibeyen nou.»

Teleco: Akize a lanse akizasyon pa li!

Ansyen kòdonatè direksyon administratif konpayi nasyonal telefòn lan (Teleko), Jean Baptiste Brissault voye jete tout akizasyon malvèsasyon ak fot administrativ grav direktè jeneral la Guy Bauduy lage sou do l pou l te revoke l. Tout dosye kouwè: apwovizyonman ak distribisyon an kabiran nan Teleko yo, acha e reparasyon machin yo, amenajman lokal ak espas biwo ki te kapab fè objè malvèsasyon, te trete dirèkteman nan kabinè teknik direksyon jeneral la. Donk, Jean Baptiste Brissault fè konnen  li revoke poutèt li te refize mete non sekretè Guy Bauduy a nan yon dokiman vwayaj pou Wachinton.

Nòt pou laprès Mouvman jèn pwogresis Gonayiv

Mouvman jèn pwogresis Gonayiv (MJPG) ap raple pèp la pandan manda Premye minis defakto a bout depi 7 fevriye 2006 la konsa tou manda prezidan defakto a Alexandre Boniface nan bout tou. Tou 2 mesye sa yo chita sou blòk glas yo yo pa vle rale kò yo pou yo pay peyi a yon chans pou l demare. Yo chita la pou yo fin piye kès peyi a. Ala bagay dous se pouvwa! Yo chita la y ap marinen konplo pou yo mete koukasasyon sou tèt prezidan Préval. Magouy sa a pap pase.

9 fevriye msye Gérard Latortue leve al siyen pou manda Minustah renouvle. 22 fevriye menm jenòm la twouve al siyen yon akò pou mete peyi a sou titèl Minustah. Aprè, li monte nan radyo pou l di akò sa a gen anpil pwen ki pa klè ladan l. Mezanmi sa fè wont pou yon gwo teknokrat tankou Gérard Latortue twouve ap siyen lèt kondanasyon l. Mezanmi yon moun pa bezwen gwo entelektyèl pou l konprann tout sa, ni Boniface Alexandre, ni Gérard Latortue ta siyen nan yon peyi a pa gen okenn avni. Paske manda moun sa yo fini deja. Se paske pèp ayisyen toleran ki fè kòb taks pèp la kontinye ap peye moun sa yo toujou. Se pa moun ki gen pyès lejitimite pou yo pran desizyon ki ta angaje nasyon an. Ni Gérard Latortue, ni Boniface Alexandre se machann peyi. Si nou kite yo la toujou y ap mete peyi a sou titèl moso pa moso. Se youn nan rezon ki fè yo rekile dat envestiti prezidan Préval la. Pèp ayisyen fò n kale je nou.

Juan Gabriel Valdés gen yon plan byen monte nan men l pou peyi Dayiti. 2 kriminèl sa yo, 2 asasen sa yo Boniface Alexandre ak Gérard Latortue dwe al pase rès tan yo menm kote yo mete Yvon Neptune, Jocelerme Privert, Anette Auguste di Sò Ann ak tout pakèt lòt militan Lavalas yo, ki dwe jwenn liberasyon yo prese prese.

Pou MJPG

Féquière Séraphin

Pòtpawòl