Vòlè bay sekrè richès Michel Brunache

Daprè jounal Miami Herald, ant 22 janvye e 12 mas vòlè piye kay Michel Brunache chèf kabinè e bofis prezidan defakto a, Boniface Alexandre. Yo pote ale plizyè gwo bijou, tankou bijou lò, kolye emewod, braslè ak yon bon kantite lajan, daprè yon rapò polis jounal la site. Gen lè Brunache gen yon rezon pou li sere lajan li lakay li olye li al mete li labank ? Toujou daprè Miami Herald, Michel Brunache te achte kay sa a k ap amenaje nan nimewo 14000, 51nyèm ri nan banlye Southwest, nan yon katye rich, Miramar, nan Miyami. Donk Brunache gen tan fè yon «ti ekonomi» pandan 2 zan li fè kom chèf kabinè prezidansyèl defakto a ? Si li rete 2 zan anko, se pa rich li ap rich anko! Papa li dwe fyè, li te byen aprann leson li.

            Michel Brunache bò kote pa l, ki t ap eseye eksplike fotin sibit sa a bay plizyè vèsyon nan mikwo plizyè radyo nan kapital la. Nan mikwo Radyo Karayib, li fè konnen se yon kay yon zanmi te prete l, paske fakti otèl madanm li ki t al akouche nan Miyami te kòmanse monte twò wo. Men nan mikwo radyo Kiskeya, li di se yon kay li te lwe. Pou Miami Herald se yon kay li achte. Donk gouvènman defakto, Alexandre/Latortue/GNBis yo, Etazini, Lafrans ak Kanada te enpoze peyi Dayiti a ap benyen nan koripsyon ak manti. N ap raple w eskandal ki te eklate, ki te fè kwè prezidan defakto a, Boniface Alexandre te genyen yon pitit gason l ki t ap touche gwo lajan nan yon konsila ayisyen an Swis san l pa travay la.

Blakawout total nan kapital la

Depi plizyè mwa se prèske pa aza abitan nan Pòtoprens wè yon anpoul limen lakay yo, kapital la plonje nan yon blakawout total. Responsab Elektrisite Deta Dayiti (EDH) ki t ap eseye bay kèk eksplikasyon, evoke 2 pwoblèm: konpayi Alstrom ki an pàn ak reparasyon k ap fèt nan santral idwolik Pelig la. Daprè minis defakto Travo piblik la (TPTC), Fritz Adrien, kriz sa a sòti esansyèlman nan yon pàn ki genyen nan konpayi Alstrom ki se yon konpayi prive ke Leta te siyen yon kontra pou founi EDH 50 megawat elektrisite.

            Yon lòt kote, santral idwolik Pelig la ki te konn founi 54 megawat  an reparasyon. Daprè direktè pwodiksyon EDH la, Joseph Alix Bastien, reparasyon sa yo ap dire anviwon yon mwa.  An nou tann yon mwa pou nou wè ki chanson minis la ak direktè a ap vin chante!

Dekouvèt 28 tèt mò nan fatra

Samdi 25 mas la, abitan Petyonvil dekouvri 17 tèt mò vlope ak papye nan de bokit  vèt, nan ri Métellus. Daprè kèk temwen se moun ki te nan yon kamyon ki te vin lage yo nan yon pil fatra la. 2 jou aprè, lendi 27 mas la, abitan Kanapevè dekouvri 11 lòt tèt mò nan yon pil fatra. PNH ak Minustah te ale avèk yo.

            Sitiyasyon sa a soulve reyaksyon plizyè sektè: ekspè nan antwopoloji, pwofesè nan inivèsite, ougan, etc., e yo chak eseye bay pwòp entèpretasyon pa yo sou sa. Daprè Rachelle Beauvoir Dominique, tèt mò sa yo te byen vlope ak etikèt sou yo pou voye nan peyi etranje pou yo itilize pou fè etid nan laboratwa.

Machann yo retounen nan mache Site Solèy la

Aprè koudeta sou prezidan konstitisyonèl la, Jean-Bertrand Aristide 29 fevriye 2004 la, sòlda Minustah yo te anvayi mache Site Solèy la, mete machan yo deyò epi tabli baz yo. Aprè anpil gwo mobilizasyon, Minustah te rive kite mache a, lendi 27 mas la, machann yo retounen nan mache a. Kèk nan yo te di: «Fòk blan Minustah yo ale pou nou ka viv kè poze, paske nou te genyen twòp move souvni pandan 2 lane ki sòt pase yo. Depi lendi m la, tout avan yè nou te sou waf la, depi lendi se la a nou ye. Se pa kontan nou kontan ankò e se pa noumenm sèlman ki kontan, ni achtè, ni vandè tout kontan, paske tout machann tounen nan plas yo».

            Mousah, youn nan òganizasyon ki t ap sansibilize machann yo pou yo te ka retounen nan mache a, fè konnen se yon chanjman li pote sitou nan ekonomi moun k ap viv Site Solèy ak retou mache a nan plas li te ye avan an.

Manifestasyon nan Gonayiv

Jedi 30 mas la, manm Fwon rezistans yo nan Gonayiv ki te genyen gwo zam fann fwa nan men yo, te òganize yon manifestasyon pou fòse sòlda Minustah yo libere yon akolit yo ki rele Billy, yo te arete pou posesyon zam ilegal madi 28 mas la. Manifestan yo te mache fèmen pòt tout biwo yo, lekòl, komès, bank yo e mete barikad nan plizyè ri, bloke tout aktivite nan vil la. Se Wilfort Ferdinand, alyas Ti Will ki te gen gwo zam lou nan men l ki te nan tèt manifestasyon an. Ti Will se yon ansyen asasyan, ki genyen manda darè dèyè l poutèt li te touye yon ti fi ki ta genyen sèlman 6 lane nan Gonayiv.

Bilan PNH

Pòtpawòl  Polis nasyonal (PNH) la, Frantz Lerebours anonse mèkredi 29 mas la, lapolis mete yon avi rechèch dèyè yon polisye ki rele Lamy Henock alias Jeff, ki vin reprezante yon danje pou lapolis. Li te debake nan direksyon jeneral PNH la madi nan Pako yon fason ki etone polisye yo, pou l te vin rankontre ak direktè jeneral PNH la. Manoucheca Lamy, sè Lamy Henock fè konnen lapolis debake nan lopital Bernard Mevs e arete l.

            Yon lòt kote, pòtpawòl la deklare PNH la obsève yon ogmantasyon nan kidnapin lan nan fen mwa mas la, kidnapin reprezante 43 pou san nan zak banditis yo e lapolis arete 12 prezime koupab pou 7 timoun yo te kidnape de fason separe. Lapolis arete 292 moun pou 179 afè trete konparativman a mwa ki sòt pase a kote yo te arete 367 moun e trete 277 afè.

Mario Andresol vle travay

Direktè jeneral Polis nasyonal (PNH) la, Mario Andresol denonse yon lòt fwa ankò koripsyon aparèy jidisyè a ak politik moun pa defakto yo ap mennen. Mario Andresol fè konnen li pa korèk pou bandi yo akize pou krim ak masak dokimante rive blanchi e libere tandis ke plizyè sitwayen yo swadizan di ki enplike nan yon seri lòt aksyon ap pouri nan prizon. Li site an patikilye ka Premye minis Yvon Neptune ki genyen 2 lane depi l fèmen nan prizon san l pa genyen okenn chaj sou do l. Li plede anfavè yon vrè dezameman nan peyi a ki pa ta dwe fèt sèlman nan katye popilè yo.

Defakto yo monte pri gaz

Nan mwa mas la, gouvènman defakto a monte yon lòt fwa ankò pri gaz la. Gazolin 91 lan ki t ap vann 159 goud pase a 179 goud, yo mete 20 goud sou li; gazolin 95 lan ki t ap vann 165 goud pase a 189 goud, yo mete 24 goud sou li. Nouvo ogmantasyon sa a reprezante plis pase 10 pou san sou mache a, lage chofè ak pasaje yo nan gwo diskisyon chak jou, taksi ki te 20 goud pase a 25 goud. Gouvènman defakto a pa janm bay okenn eksplikasyon, chofè yo bò kote pa yo anonse yo pral pran dispozisyon pou fòse gouvènman an bese pri gaz la.

OPC ap bay dizon li

Nan okazyon 19vyèm anivèsè konstitisyon an, 29 mas 1987-29 mas 2006, Ofis pwoteksyon sitwayen te òganize yon jounen pòt louvri. Pwotektè sitwayen an, Necker Dessables te pwofite okazyon sa a pou mande otorite yo respekte e aplike chat fondamantal la. Li te pwofite tou fè bilan aktivite Ofis la e difikilte l ap konfwonte. Li fè konnen Ofis la genyen yon bidjè ki pa depase 10 milyon goud chak ane, ki pa ka reponn a bezwen l. Li denonse yon sitiyasyon ki genyen nan penitansye nasyonal, kote genyen plis pase 2 mil prizonye pou yon kote ki te fèt pou fèmen sèlman 800 moun.

KEP la ap refè eleksyon kèk kote

Aprè l te fin trete plizyè dosye kontestasyon kandida yo nan plizyè sikonskripsyon elektoral, Konsèy elektoral pwovizwa (KEP) a deside refè eleksyon premye tou nan 14 sikonskripsyon: Site Solèy, Gantye/Fon Verèt, Tigwav e Koniyon, La Chapelle, Grand Salin, Ennery e Gwomòn, Pestel/Beaumont ak Mowon/Chanbelan, Saint-Suzanne, Kanperen/Manich, Beladè, Bonbadopolis. Pou depatman Nòdès la, genyen 153 kandida pami yo 23 pou senatè ki pral patisipe 21 avril nan eleksyon yo.

Minustah ak PNH fè konnen yo pral pran tout dispozisyon pou asire sekirite jou eleksyon yo.

Revokasyon direktè administratif Teleko a

Daprè Ajans ayisyèn près, ki site yon sous pwòch direksyon jeneral Teleko a, direktè administratif la, Jean-Baptiste Brisseau te revoke pou fòt administratif grav. Depi kèk semèn plizyè kad nan administrasyon piblik yo denonse tout sòt dezòd ki genyen nan administrasyon yo, plizyè nominasyon ak pwomosyon k ap fèt avan pasasyon pouvwa bay prezidan eli a, René Garcia Préval. Biwo Premye minis defakto a te fè sanblan pran yon kominike kont sa.

Kontenjan espayòl ak mawoken yo pati

Daprè ajans espayòl EFE, retrè kontenjan espayòl ki te nan Minustah fini 29 mas la. 100 sòlda ki te rete nan 200 militè Espay yo te genyen nan Minustah ki te nan depatman Nòdès la, nan Fòlibète, retounen an Espay. Sòlda mawoken yo te deja kite peyi a. Se yon batayon Uruguay ki ranplase twoup espayòl ak mawoken yo nan Nòdès la.

Arestasyon 33 moun nan Twou di Nò

Yon responsab Polis Nasyonzini an (UNPOL), Marc Jacquet, fè konnen, nan yon operasyon yo te mennen ansanm ak Polis Nasyonal (PNH) la, samdi 25 mas la, nan depatman Nòdwès la, nan Twou di Nò, yo rive arete 33 moun ki t ap prepare pou al fè dezòd nan eleksyon yo. Pami yo, te genyen 11 ki jwenn liberasyon yo, 20 plase an gadavi e 2 ansyen kondane yo t ap chèche.

            Operasyon an te mennen pa 50 ajan PNH, 11 polis UNPOL ak 16 militè ajanten ki te patisipe.

            Li te tou pwofite fè bilan operasyon «Bonjou» li a, kote li di yo deja rekipere plizyè zam ilegal ak plizyè machin yo te vòlè e yo arete 4 moun ki te patisipe nan kidnapin.

Enstalasyon nouvo responsab CCM/Ayiti

Nan yon seremoni nan lokal ministè defakto Kondisyon fanm yo, an prezans direktè fondasyon Sogebank k ap okipe l de Fon mondyal la, Emile Hérald Charles, reprezantan FNUAP la, Hernando Clavijo ak plizyè reprezantan ONG nan lit kont Sida, nouvo responsab yo te enstale mèkredi 29 mas la. Se nan yon eleksyon yo te òganize nan CCM/Ayiti, yo te chwazi minis Sante piblik defakto a Josette Bijou kòm prezidan e Pierre Despagne kòm visprezidan.

Ansyen militè yo ap reparèt pou mande lajan!

Ansyen militè nan Okay ki te nan 49nevyèm konpayi a, mande gouvènman defakto Alexandre/Latortue a peye yo 10zan aryere salè yo dwe yo. Plizyè nan yo fè konnen yo deja fè 20 vwayaj, depanse lajan pou al bò kote kolonèl Jacques Jeudy pou yo wè si l ta peye yo lajan yo, nad marinad yo pa janm jwenn 5 kòb. Yo fè konnen jounen jodi a yo bouke monte desann nan biwo swadizan ki la pou jere dosye ansyen militè yo. Devan sitiyasyon sa a yo di yo prè pou yo pase alaksyon si otorite defakto yo pa pran ka yo an konsiderasyon.

Defakto yo pran trik pou bay tèt yo dechaj

Biwo kominikasyon primati a pibliye rapò konsèy minis defakto yo ki te fèt mèkredi 29 mas la. Minis defakto yo te apwouve yon pwojè dekrè sou lejislasyon spòtif, sekretè Deta jenès spò ak edikasyon sivik Paul Berne te pwopoze: «Pwojè dekrè relatif a pwomosyon, òganizasyon, kòdinasyon e sipèvizyon aktivite fizik e spòtif  yo».

            Epi aprè rekòmandasyon kou siperyè dèkont e kontansye administratif, konsèy minis yo bay dechaj a sitwayen sa yo: Jacques Edouard Alexis, eksminis Enteryè ak kolektivite teritoryal yo e eks Premye minis, Bernard Gousse, eks minis Jistis ak sekirite piblik, Charles Beaulieu, eks minis Ekonomi ak finans, André Jean-Louis, eks minis Agrikilti, resous natirèl e devlopman riral, epi Carl Michel Nicolas, eksminis Enteryè e defans nasyonal. Yo melanje tout moun ansanm pou yo kapab bay volè pa yo dechaj. Sèlman moun pa konnen ki kalte trik Gérard Latortue pral itilize pou li eksplike tout vagabonday li siyen «san li pa li yo». E kouman yo pral eksplike fotin Michel Brunache, chèf kabinè Boniface Alexandre?