Kondanasyon 2 vyolè kriminèl

Mèkredi 22 mas, yon tribinal san asistans jiri kondane Mackenson Joseph e Eliphète Beljean avi nan prizon ae travo fòse, pou patisipasyon yo nan yon vyòl kolektif 27 fevriye 2005 sou yon dam ak pitit fi li 16 zan, ke yo vin jwenn mouri 4 mwa apre.

Jij Bredy Fabien, fè konnen li pwononse vèdik li an konfòmite ak atik 281 kòd penal la, e li kondane 2 kriminèl sa yo pou yo peye 500 mil goud kòm domaj e enterè. Men yo potko arete 3 lot asasen ki te nan ekip kriminèl sa yo.

KEP la ap fè règleman eleksyon toujou

Gouvènman defakto a pran yon arete prezidansyèl vandredi 17 mas la pou konfime dat 21 avril la KEP la te pwopoze pou dezyèm tou lejislativ yo. Dapre konsèy elektoral pwovizwa (KEP) la, genyen 60 kandida  pou sena e 187 pou depitasyon. Pati ki genyen plis kandida nan dezyèm tou a se Platfòm Lespwa ak pati Fizyon sosyodemokrat yo.Nan premye tou eleksyon yo se sèlman 2 depite ki te pase: Denis Francenet sou banyè Kowalisyon Inyon Chavannes Jeune ap dirije a, pou sikonskripsyon Lazil, li ranpòte ak 63 pou san vòt yo e Elourd Saint Louis Fleurimé, ki te prezante sou banyè Fizyon pou sikonskripsyon Lagonav.

            KEP la anonse eleksyon yo pral refèt pou 2 sikonskripsyon nan depatman Latibonit : Grand Salin ak La Chapelle e yo te oblije rekonte bilten yo pou senatè pou 2 sikonskripsyon nan depatman Sid la : Tòbèk e Chantal.

            Men genyen plizyè lòt sikonskripsyon kote kandida yo ap denonse KEP la yo di ki pa pran pwotestasyon yo an konsiderasyon.

Teleko an difikilte

Direktè jeneral Teleko a, Guy Beauduy, denonse sabotaj konpayi a ap sibi nan zòn metwopolitèn lan. Nan zòn ayewopò a, pi fò aktivite yo te bloke, menm avyon yo pat kapab vole. Moun yo pat rive idantifye sabotè yon sit Teleko, yo pote ale plis pase 2 mil pye kab ak 2 mil pè nan Boutilye, menm poto yo bandi yo rache. Devan sitiyasyon sa a, Guy Beauduy mande otorite yo pran responsabilite yo

            Pandan tan sa a yon konfli eklate ant Teleko e Ayitèl, pou 6 milyon dola Ayitèl dwe Teleko, Ayitèl poze kòm kondisyon pou l peye Teleko, siyati yon kontra avèk Konatèl, san l pa pase pa Teleko jan l te konn fè l avan. Ayitèl fè konnen depi Konatèl ta fin siyen kontra a avèk li l ap vèse 2 milyon dola.

Nouvo anbasadè Etazini

Vandredi 17 mas la, nouvo anbasadè Etazini an ann Ayiti, Janet Ann Sanderson remèt lèt de kreyans li bay prezidan defakto a, Boniface Alexandre nan Palè nasyonal. Prezidan George W. Bush te nonmen Janet A Sanderson 7 novanm 2005 lan pou ranplase James B. Foley, e sena a te ratifye l, 16 fevriye 2006.

            Avan l te vin ann Ayiti, Janet A. Sanderson te reprezante Etazini nan Aljeri, li te okipe plizyè lòt fonksyon kou wè chèf adjwen nan misyon nan Jòdani ; minis konseye nan zafè ekonomik nan anbasad Etazini nan Egypte, li te travay nan plizyè lòt enstitisyon e òganizasyon Etazini.

Otorite Suriname entèpele 6 ayisyen

Dapre yon depèch ajans karayibeyèn « Caribbean Net News », pòtpawòl lapolis Surinam lan, Maritha Ritfeld-Asontoe, lapolis arete 6 ayisyen ki t ap antre ilegal nan Suriname nan mwa mas la. Pami 6 ayisyen sa o genyen : 2 gason, 2 fanm e 2 timoun ; ayisyen sa yo te rive san viza nan ayewopò Entènasyonal Paramaribo, kapital Surinam. 6 ayisyen sa yo te nan yon gwoup 125 lòt ayisyen ki te gen bon papye nan men yo, yo te gen viza valid pou 30 jou.

Arestasyon 5 polisye

Samdi 18 mas la, enspeksyon jeneral polis nasyonal (PNH) fè arete 5 polisye nan direksyon depatmantal Nip lan, nan Miragwàn. 5 polisye sa yo ki te nan inite espesyal  UDMO, akize nan yon operasyon detounman dwòg e 75 mil dola. Dapre yon responsab PNH, Marie Yolande Damas, polisye sa yo te al mennen yon operasyon fouy san otorizasyon direksyon polis la nan Kafou Deriso, nan antre Miragwàn.

Repiblik Dominikèn kontinye rapatriman

Responsab Gwoup dapui a rapatriye ak refijye yo (GARR) kontinye ap denonse fason Repiblik Dominikèn ap voye konpatriyòt nou yo tounen. Dapre responsab GARR la, Anthonal Mortimé, sòti 13 pou rive 16 mas, komite Beladè a resanse 600 rapatriman. Pami 600 moun sa yo genyen tifi, ti gason ki poko genyen 18 lane. 

Chatbari dèyè Gérard Latortue

Apre Premye minis defakto a, Gérard Latortue, te deklare sou emisyon Le Point nan televizyon Radyo Kanada, ke pandan 2 lane li pase nan gouvènman li a, li fè tout sa l kapab pou evite yon gè sivil nan peyi a, e rive òganize eleksyon yo. Plizyè responsab politik reyaji pou demanti Latortue e akize l kòm moun ki t ap chache pwovoke yon gè sivil nan peyi a.

            Lidè GREH a Himler Rébu, kalifye deklarasyon Latortue yo de fafeli e demagojik. Li di tout kondisyon te reyini 7 fevriye pou te genyen yon eklatman sosyal nan peyi a, men pèp ayisyen an ki te trè entèlijan, ki te rive kontoune danje a. Li denonse konpòtman malonèt otorite defakto yo.

            Lidè Mochrenha bò kote pa l Luc Mésadieu denonse fanfawonad deklarasyon Latortue a, li fè konnen Latortue plis kontribye pou kraze peyi olye li te bay yon kout men pou rekonstrui. Poutan se mesye sa yo ki te nan travay tou pou ranvèse gouvènman konstitisyonèl prezidan Aristid la pou fè blan meriken vin enstale Latortue. Se konyè a yo koumanse konprann.

SOS UNICEF  pou timoun

Nan yon rapò entènasyonal sou sitiyasyon timoun ann Ayiti, fon nasyonzini pou timoun (UNICEF) pibliye 22 mas la, li lanse yon SOS pou timoun yo. Dapre rapò a, timoun ki fèt ann Ayiti ap kouri plis danje pou yo mouri lè yo fèt pase tout lòt timoun ki fèt nan peyi ki nan emisfè oksidantal la. Ann Ayiti yon timoun sou 14 pa viv pou lontan, yo pa menm ka rive fete premye anivèsè yo.

Vizit 2 kongrèsman Etazini

Lendi 20 mas la, 2 kongresman Etazini te fè yon vizit 4 trè tan nan Pòtoprens: repibliken Mark Foley ak demokrat Maxime Waters ki te rankontre avèk prezidan eli a, René Préval e avèk kèk manm nan sektè prive a. 2 palmantè sa yo te pote apui yo bay prezidan René Préval.

Kolektif fanmi prizonye politik yo mande libeasyon yo

Kolektif fanmi prizonye politik la te òganize yon sitin devan palè jitis la nan madi 21 mas la, pou denonse movè kondisyon prizonye politik yo nan Penitansye nasyonal e reklame liberasyon yo san kondisyon. «Moun yo ap dòmi pa relèv, pou moun ap mare dra pou ap dòmi, li pa fè sans. Se sa k fè noumenm kolektif fanmi prizonye yo, nou oblije pran lari a pou nou mande jij yo, èske yomenm yo pa ta ka nan plas sa a tou. Lè moun anndan penitansye a ap fè yon lane, 2 lane, 8 mwa, 7 mwa yo pa janm pase devan jij. Noumenm kolektif fanmi prizonye, nou di se swa yo jije moun yo oubyen yo libere yo.»

Hubert De Ronceray di li rale kò l

Lidè GFCD a Hubert Deronceray anonse samdi 18 mas la li pran dispozisyon pou l pa ale dèyè okenn pòs elektif nan peyi a. Li fè konnen li pat janm ap chache okipe yon pòs pa foli pouvwa, men se te volonte l ak devouman l pou l te ede Ayiti soti nan twou li ye a. Li di lè a rive pou yon lòt jenerasyon pran la relèv. Gen lontan ke Deronceray te dwe wè sa, li pa t bezwen ale nan eleksyon pou montre ke pèsonn pa vle vote pou divalyeris.

Mario Andresol fikse pozisyon l sou dosye masak Matisan

Direktè jeneral Polis nasyonal (PNH) la, Mario Andresol fikse pozisyon l sou dosye masak Gran ravin lan nan Matisan ; li fè konnen dosye sa a se yon afè klase pou polis nasyonal la. Dapre Andresol, lapolis te fin travay li, li te deja mennen ankèt sou dosye yo remèt rapò l e sa te pèmèt plizyè arestasyon fèt. Men li di yo mal entèprete travay PNH te fè a. Li fè konnen direksyon PNH la ap prepare l pou l bay pozisyon sou liberasyon 6 nan moun yo te arete yo.

            Yon lòt kote, Mario Andresol fè konnen madi 21 mas la, kidnapin yo fè yon ti bese nan dènye jou sa yo nan kapital la. Lapolis anrejistre sèlman kèk kidnapin. Fenomèn zenglendo sanble ak retounen nan kapital la, yo anrejistre kèk ka vòl lannuit nan zòn Kanapevè. Li di lapolis deja idantifye volè sa yo e genyen gwo dispozisyon k ap pran kont yo.