Nan peyi Dayiti
Nouvèl Kout Kreyòl
Vizit Prezidan an nan Lasalin
Apre dezas, dife ki te lakoz plizyè milye ti kay te kraze e boule
nan Lasalin lan e plizye fanmi ap dòmi nan lari, prezidan Jean-Bertrand
Aristide te rann yon vizit nan katye a, kote plizyè milye moun te
akeyi l e prezante revandikasyon yo. Aristide te fè divès
pwomès «Premye jès mwen fè deja yo, nan sa m
voye pou nou yo ki boule yo, se devwa m, m ap rebati yo pou nou yo ki poko
anyen. M ap vin di nou, kay nou yo ki boule yo, se devwa m, m ap rebati
yo pou nou. Tout moun ki gen non yo sou lis, konnen travay la se kòmanse
n kòmanse, nou pral kontinye l... Moun nou arete deja yo, yo nan
prizon, lajistis pral fè travay li. Lòt moun ki koupab, lajistis
ap chache yo... Kanta pou machann nan Kwabosal, mwen bay lòd yè
pou netwaye ni mache, ni zòn lan. E CNE ap fè yon bèl
travay nan sans sa a. Pa kite anyen moun vin pran kòb nan men nou,
pou fè nou abi, eksplwate nou...» Pandan tout pwomès
sa yo, non sèlman divès moun ap plenyen yo pa jwenn menm
ti èd madan Suréna nan ministè Enteryè te di
gouvènman an voye pou viktim Lasalin yo e anplis, gen yon latriye
moun ki di gouvènman bay yon seri moun ki te konplis nan kraze brize
katye sa a.
Okap: Lameri a pa gen lajan
Wilma Innocent ki se premye majistra komin Okap deklare ke lameri a
ap travèse gwo pwoblèm, kote ponpye, anplwaye pa ka touche
akoz lajan gouvènman ba yo a ki pa sifi. Atout lameri a lanse apèl
pou sitwayen vil la peye taks, se nad marinad, selon majistra Innocent
toujou, ki ajoute ke l ap mennen demach pou yon pati nan taks sou zòn
touristik Labadi a ta vin jwenn administrasyon kominal la. «... Vin
gen anplwaye kounye a ki refize sèvis travay. Poukisa, se paske
yo gen anviwon yon mwa yo pa touche». Majistra di tou gen labatwa
nan Madlin lan ki pa ka fonksyonne akoz li pa gen dlo. Men li di li pral
fè jefò pou labatwa sa a retounen mache kòm oparavan.
Antouka, lalwa jiskaprezan bay lameri dwa pou evalye valè moun ak
valè taks ki peye nan komin lan, pou sèten sektè.
Men se direksyon jeneral enpò (DGI) ki gen dwa touche taks yo dirèkteman,
apre sa DGI voye pati pa l ba li.
Katèl lameri Pòtoprens lan disoud
Apre tout dezòd tire ki te genyen ant patizan mè an chèf
la ak adjwen li yo, yon dekrè prezidansyèl ki te sòti
nan dat 6 novanm lan te fè konnen konsèy minisipal Pòtoprens
lan, ki te gen madan Duperval alatèt li, pa ekziste ankò.
E sa fèt selon atik 72 konstitisyon an ke lapezidans lan mete ann
aplikasyon. Arete sa a ki siyen pa prezidan larepiblik la, Jean-Bertrand
Aristide, Premye minis la Jean-Marie Chérestal ak minis Enteryè
a, Henry-Claude Ménard, òdone pou yo poze sele sou pòt
lameri a jiska nouvèl òd.
Asasina Louisjès Bus
Louisjes Bus ki te gen 69 tan, mouri anba bal nan dimanch 4 novanm 2001 an, vè 10 zè nan aswè, lakay li nan Mabriyòl ki se dezyèm seksyon kominal Belans nan Sidès la. Louisjes ki te yon kòmèsan, e yon ansyen kandida Konakom; selon yon pwòch li nan Jakmèl, li te pran anpil bal, yo te mare li, kase tèt li, anvan yo te touye li, epi yo te volè li, bwote lajan lakay li.
*~