Nan peyi Dayiti
Nouvèl Kout Kreyòl
Fondasyon 30 septanm denonse dilatwa
Responsab Fondasyon 30 sektanm lan Lovinsky Pierre Antoine denonse demach
avoka senatè Dany Toussaint kòm bagay ki ilegal. Responsab
Fondasyon an ki te de pasay jan Gwomòn (Latibonit) e ki t ap ekspoze
foto viktim koudeta yo t ap keksyone tèt li konsènan atitid
senatè Dany Toussaint ki kontinye ap bare lawout lajistis lè
l deside pa reponn konvokasyon jij Claudy Gassant yo. Lovinsky te kalifye
demach avoka Dany Toussaint yo kòm dilatwa.
Senatè Dany Toussaint pa t prezante ankò
Pou yon dezyèm fwa
nan mwa jiyè 2001 an senatè lwès la Dany Toussaint
pa t prezante nan konvokasyon jij enstriksyon an Claudy Gassant nan dat
16 jiyè a. Avoka Toussaint yo te di deja lendi 16 jiyè a
ke senatè a pap janm prezante ankò devan jij ki gen kapasite
pou kontinye mennen ankèt la.
Lantèman Magloire te fèt
Nan jou jiyè 2001
an, lantèman ansyen prezidan jeneral Paul Eugène Magloire
te chante nan legliz Sen Pyè nan Petyonvil, kote divès pèsonnalite
te patisipe. Nan okazyon an gouvènman an te obsève yon jounen
dèy nasyonal ki pa t respekte totalman. Magloire mouri kite plizyè
pitit li ki gen anpil laj tou. Pami yo nou jwenn Raymond, Elsie, Myrtha,
Yola ak Pierre Louis Arsène Magloire. Mouche te mouri a laj 94 zan,
nan dat 12 jiyè pase a. Se te yon lantèman nasyonal toutmenm.
«Sosyete sivil» la prese...
Inisyativ sosyete sivil la
koumanse montre yo enpasyan nan rete tann Fanmi Lavalas ak Konvèjans
lan antann yo sou yon dat pou reprann «negosiyasyon» yo. «Nou
te swete reprann diskisyon yo yon fason fòmèl, paske tan
ap pase», te di Edouard Paultre. «Sosyete sivil» la prese
pou bouyi vide a koumanse.
Otorite dominiken ap kontinye rapatriman yo
Jedi 12 jiyè 2001
an otorite dominiken yo te voye tounen ann Ayiti 7 ayisyen nan move kondisyon.
Ayisyen sa yo te rapatriye nan zòn Sèka Lasous, toupre fwontye
a. Majistra zòn lan Pierre Francklyn te denonse fason responsab
dominiken yo voye moun yo tounen an. «Yo vini ak 2 men yo 2 pye
yo, ak sèl ti rad yo te gen sou kò yo», te di majistra
adjwen Sèka Lasous la ki te mande pou ministè Enteryè
ak ministè lajistis mete yon seri biwo kontwòl pou voye je
sou rantre sòti nan zòn lan.
28 jiyè 1915 - 28 jiyè 2001
Sa fè 86 lane depi
meriken ak koutye l yo ap sapata lespwa demokrasi, lavi miyò ak
liberasyon mas pèp ayisyen an.
19 septanm 1994: nouvo konze yo montre yo pi koutye nan sèvi
enterè meriken ak boujwa patripòch kont enterè popilasyon
malere a.
Nan okazyon 28 jiyè
2001 an, divès òganizasyon popilè kouwè: Kako,
Kodena, CCN, AMAP, MLA ap tanmen yon moman refleksyon sou 2 dat madichon
sa yo, k ap akonpaye yon ekspozisyon foto ak yon pwojeksyon fim.
Aktivite sa yo ap fè
nan ri Timas Pwolonje, lokal legliz Sen Michèl la, sòti 10zè
nan maten pou rive 6zè nan lapre midi.
Kanmarad, patisipasyon w
enpòtan!
Jakmèl: Asiz kriminèl
Se jounen lendi 23 jiyè 2001 an, asiz pou jije prezime kriminèl
yo ap kòmanse. Pandan asiz sa yo, daprè komisè gouvènman
Jakmèl la mèt Lionel Constant Beaubrun, tribinal la ap genyen
pou li tande 11 ka. 10 ka ak asistans jiri ak yon ka san asistans jiri.
Toujou selon komisè gouvènman an, si moun yo chwazi kòm
manm jiri yo pa ta reponn prezan, tribinal la ap sanksyone moun sa yo.
Yon lòt kote malgre gen anpil rimè ki ta fè kwè
ke moun ki akize nan lanmò 2 resòtisan fransè yo ak
ayisyen an nan lane 2000 la ap genyen pou li jije nan asiz sa yo, komisè
Bougrain fè konnen: yo panko ap tande ka sa yo paske dosye a panko
konplè. Asiz yo ap dire plis pase 3 semèn nan Jakmèl.
Tyòt: agresyon kont yon jounalis
Jounen madi ki te 17 jiyè 2001 nan komin Tyòt, yon jounalis
ki pote non Confident Edner ki ap travay nan radyo kominotè Bèlans
e ki se korespondan radyo Tele Express Continental nan vil Jakmel denonse
agresyon li sibi nan men yon endividi ki rele Michel Mardi ki ta swadizan
se yon polis riral. Jounalis la di li sibi agresyon sa yo sanble paske
li te ale nan Komin Tyòt pou li te al ankete sou yon arestasyon
la polis te fè ilegal. Confident di tou: se tout la jounen Michel
Mardi ap mache ak yon fizi 12 nan men li pouli ka entimide popilasyon an.
Selon Confident toujou: Michel Mardi ki konpòte kòm yon kòbòy
nan zòn di li genyen yon tas kafe anmè pou li bwè
ak tout jounalis nan zòn nan paske se yo menm ki enpoze l fè
travay li. Devan sitiyasyon makaron sa yo Confident Edner mande tout asosyasyon
jounalis Sidès tankou nan Kapital ak peyi etranje answit gouvènman
peyi a pou di yon mo sou fason y ap trete jounalis yo anndan peyi a sitou
lè nou sonje kòman yon konfrè nou Jean Dominique sot
disparèt tankou yon kout zèklè e jouk jounen jodi
a se tolalito y ap fè ak dosye sila a.
Benè: Yon nouvo Jij de pè
Nan wikenn ki sot pase a, nou vle pale de vandredi ki te 20 jiyè
a, komisè gouvènman Jakmèl la mèt Lionel Constant
Bourgain avèk kèk responsab polis jidisyè te rann
yo nan komin Benè pou te enstale mèt Michel Simplice kòm
nouvo jij de pè nan komin Benè. Nan yon diskou tou kout li
te fè, nouvo jij la mèt Michel Simplice di li pral travay
pou li fè aplike la lwa kòmsadwa e bay jistis tout moun ki
merite jistis. Antouka nou ta swete sa, fòk nou di tou nouvo jij
de pè sila ranplase ansyen jij de pè Benè Jij Henry
Georges ki te mouri nan mwa desanm 2000 ki sot pase a.
Lavale: depite Etzer Valentin dakò pou eleksyon antisipe yo
Desizyon prezidan Aristide pran pou koupe nan manda eli ki te soti nan eleksyon 21 me 2000 yo soulve anpil enkyetid bòkote depite Valentin ki di: desizyon pou fè eleksyon antisipe an novanm 2002 se vre li pa nan konstitisyon an; paske se pèp la ki te vote l se limenm tou ki ta dwe bay dizon li. Selon depite a, kòm enterè peyi a dwe pase avan se sa ki fè li pa gen twòp pwoblèm avek demach sa yo; sepandan depite Valentin di li pa ka konprann atitid kominote entènasyonal la li ki montre li ap jwe yon wòl ipokrit. Antouka tout moun konnen jwèt la trè byen ke dirijan la Fanmi Lavalas ap jwe lè yo bezwen pouvwa yo itilize do pèp la pou chwal papa men se lè pou fè tout vye konpromi ak ekip Konze parèy yo ki nan Konvèjans, yo pa bezwen pèp la.
*~