Nan peyi Dayiti
Nouvèl Kout Kreyòl
Senatè a mande sekou
Senatè Fourel Célestin ki te ranplase pwovizwaman Yvon
Neptune kòm prezidan Sena a, nan seyans madi 5 jen an, mande ke
«palmantè
tout pati nan lemonn, pa yon aksyon tèt ansanm pou ede nou desere
boulon sanksyon yo ke zanmi ayè nou yo ap menase nou an, ...47èm
lejislati ayisyen an pwomèt ou bò pa l, pi gwo kolaborasyon
e li di w li prese pou l enskri l nan gwo rezo fanmi inivèsèl
eli nan lemonn yo».
Kriz nan INAGHEI
Apre etidyan preparatwa nan Enstiti
nasyonal jesyon ak Ot etid entènasyonal (INAGHEI) te fin leve kanpe
pou pwoteste kont konsèy direksyon ki te sòti nan eleksyon
11 me pase a, dirijan fakilte a te deside mete 4 etidyan deyò. Lòt
etidyan nan fakilte a te kontinye mobilize kont eleksyon bouyi vide 11
me a e pou yo reprann 4 etidyan yo nan INAGHEI. Yon etidyan te pale sou
agresyon y ap sibi nan men kèk pwofes: «Donk kèk pwofesè,
an patikilye misye Alexis te rezijen l pèdi moral li. Antanke pwofesè,
pou afwonte dirèkteman ou fizikman kèk nan nou. Poutan nou
te kontinye ap manifeste respè nou pou pwofesè sa yo e malgre
divès mannèv pou bloke seleksyon 11 me a. Nou pran menm pou
n pa agrese yo... Malgre tout bagay, yo se pwofesè.»
Senatè Toussaint pa prezante li
Jij Gassant k ap mennen ankèt
sou lanmò Jean Dominique ak Jean-Claude Louissaint te konvoke senatè
Dany Toussaint ak zanmi li ansyen militè Richard Salomon alias «Chacha»
pou yon nevyèm fwa jou madi 5 jen ki an. Senatè a pa t met
pwent pye l sou pretèks ke li pa te okouran konvokasyon an. Men
nan tout deklarasyon apre konvokasyon anvan yo, senatè Toussaint
te toujou di li aladispozisyon lajistis nenpòt ki lè. Kòmdebyenantandi
Richard «Chacha» Salomon pa t prezante tou.
Senatè Gérald Gilles ap dedi tèt li
Prezidan Aristide te rankontre
mèkredi 6 jen an ak 6 nan 7 palmantè «demisyonnè»
Fanmi Lavalas yo, kote senatè Gérald Gilles limenm te rapòte
ke «yo aksepte demisyonne pou yo debloke sitiyasyon politik peyi
Dayiti». Poutan lè yo t ap rapòte afè konsesyon
prezidan Aristide voye ale nan 5 pwen nan Asanble OEA a, se menm senatè
Gilles sa a ki t ap rele ke opozisyon an pa gen baz popilè e l ap
itilize mwayen kominikasyon pou enpoze opinyon li...» Men ki lès
ki kite li enpoze opinyon li si se pa dirijan Fanmi Lavalas la yo menm
e pami yo senatè Gerald Gilles?
Nominasyon Boniface Alexandre prezidan kou kasasyon
Yon arete prezidansyèl nan
dat lendi 4 jen 2001 «nonmen sitwayen Boniface Alexandre kòm
prezidan, sitwayen Charles Danastor, Menan Pierre Louis, Arthur Gérard
Delbot, Pierre Reynold Jean-Baptiste, Jacques Armand Charles avèk
Michèl Donatien kòm jij lakou kasasyon». Boniface ranplase
ansyen prezidan lakou a, defen jij Clausel Débrosse. Arete sa a
pote siyati prezidan Jean-Bertrand Aristide, premye Minis Jean-Marie Chérestal
ak minis Lajistis la, Gary Lissade.
7 milyon pou resansman
Minis ekonomi ak finans lan, Faubert
Gustave siyen jedi 7 jen an, yon akò yon valè 7 milyon dola
ak reprezantan FNUAP ann Ayiti a, nan kad yon pwojè pou fè
resansman popilasyon an yon katriyèm fwa. Minis lan te montre li
apresye jès la, byenke lajan an poko nan men l. Direktè IHSI
(Enstiti ayisyen estatistik ak enfòmatik), Joseph Evens te fè
kwè gen 18 mil ajan anketè ak plis pase 4 mil sipèvizè
ki pral deplwaye nan 9 depatman an pou konte popilasyon an. Reprezantan
FNUAP la li te di: «Yon operasyon prèske militè m ta
di. Ki pral dire 18 mwa; ant avril 2002 ak desanm 2003... e ki pral mobilize
prèske 9 milyon dola...» Sou 7 milyon dola FNUAP pwomèt
la, ap gen yon milyon dola gouvènman ayisyen ap ajoute, anplis responsab
yo di gen yon milyon ki gen tan pase nan preparasyon.
Liberasyon eks-depite Fortuné
Plizyè mouvman pwòch
Fanmi Lavalas te manifeste nan vil Okay kont liberasyon manm Konvèjans
lan, ansyen palmantè e kandida Gabriel Fortuné, ki te fèt
madi 5 jen an. Polisye UDMO yo te rive fè 4 arestasyon pami moun
ki t ap pwoteste liberasyon sa a. Yon lòt bò manm OP yo te
fèmen pòt tribinal la apre desizyon sa a yo te wè
ki pa t lojik.
Delege Sid la devwale yon plan kont vi li
Delege Sid la Jacques Mathelier ki te bay yon konferans mèkredi 6 jen an deklare ke gen yon plan k ap mannen pou asasinen l depi 2 semenn pa Konvèjans demokratik la. «Sa ki enpòtan, delege Mathelier se yon obstak a Konvèjans anndan depatman Sid. Yo planifye, yo mete yo dakò pou yo etenn souf delege depatmantal la», t ap di Mathelier limenm. Delege a lonje dwèt li sou «kèk eleman anndan lapolis nasyonal la e sètènman tankou mwen aprann, ki nan direksyon depatmantal lapolis la», se sa li te di e li te mande yo leve aktyèl direktè depatmantal lapolis la Ralph Dominique, ki pa gen plis pase 2 mwa depi li nan pòs la nan Sid.
*~