Nan peyi Dayiti
Nouvèl Kout Kreyòl
Lakwawouj an pàn san
Lakwawouj ayisyen pou anivèsè li jou 8 me a te bay yon
konferans pou laprès nan fakilte dwa ak syans ekonomik Pòtoprens,
kote responsab li yo te debat sou tèm «jenès ak Lakwawouj
osèvis sosyete a». Aktivite sa a se te pou sansibilize popilasyon
an sou enpòtans ak wòl Lakwawouj. Reprezantan òganism
lan Periclès Jean-Baptiste ak Yanick Bell te plenyen anpil lefèt
sèjousi moun neglije pou vin bay san yo nan «divès
pòs transfizyon san». Yon pasyan te di ke «difikilte
pou bay san an se pwoblèm afè sida a, paske lontan Lakwawouj
omwen te konn genyen pasyan ki konn vin bay, lè ou gen yon pwoblèm,
li ede malad la, kounye a Lakwawouj ekzije w fòk ou vini avèk
donè a pou bay li, alèkile pou l kapab bay lòt malad
la». Lòt pwoblèm ki fè moun yo pa al bay san
sou menm rit la ankò, se keksyon moun pa ka manje. Eske yon moun
k ap mal manje ap an sante e jous li jwenn san pou l al bay pou moun ki
malad? Sa pa fasil.
Minis lan pran desepsyon
Minis Lakilti ak Kominikasyon an
Guy Paul di lefèt pati politik nan gwoup Konvèjans lan te
refize al rankontre gouvènman e Fanmi Lavalas nan Mupanah mèkredi
9 me a, kote prezidan Aristide t ap prezan, se yon gwo desepsyon pou «kan
gouvènman an, paske franchman yo te konprann ke sa te ka fè
bagay yo avanse e nou wè bagay yo rete anplas menm kote a».
Lapolis ta mete lapat sou yon kidnapè
«Polis nasyonal Dayiti te
enfòme yè madi a vè 5 ke de yon tantativ kidnaping
ki ta pral opere sou yon endistriyèl ayisyen tout moun konnen, ki
pote non Frantz Charlo... Li te remake yon ansanm endividi abò yon
machin ki t ap eseye bloke sikilasyon li menm, e li menm entelijan l ye
li te refijye li nan yon kay nan vwazinay la, sou wout Taba a. Epi rapidman,
li enfòme lapolis sitiyasyon ke l tap viv la, e lapolis pa t pran
tan pou te mobilize yon ansanm inite otou sitiyasyon sa a e te fè
yon entèvansyon rapid, ki ta pral pèmèt nou met men
nan kòlèt yon endividi ki reponn sou non Joanis Beaulieu,
ki te gen inifòm lapolis sou li, alòs li pa t polisye. Nan
men l nou te jwenn yon kalib 38 e n ap di li te monte yon wonnda sivik
2 pòt, vit fimen...», te deklare pòt pawòl lapolis
la, Jean Dady Siméon, ki pa t di kot lòt konplis yo pase.
Antouka, achak sitiyasyon k ap boulvèse peyi a, lapolis toujou prezante
moun li arete, men sa pa janm al pi lwen.
Gouvènman an mande leve sanksyon yo
Pa vwa minis Lakilti a Guy Paul,
gouvènman ayisyen an mande pou Inyon Ewòpeyen (EU) ta leve
sanksyon l pran pou pa bay Ayiti «èd» la. Minis lan
te di sa nan yon diskou li te fè nan yon resepsyon ann lonnè
delege EU a ann Ayiti.
Mitrayad fè anpil blese Fònasyonal
Madi 8 me a vè 6 zè
30 nan aswè, lari ri Estime (Sou Fò) te blanch kou koton,
apre yon gwo djip Pathfinder vit fimen te fin simen bal sou yon latriye
moun, ki te estannbay kote divès jenn gason konn reyini. 7 moun
anviwon te blese, pami yo youn te vin pèdi lavi l pa laswit.
Dra
po m
Drapo pa m
Kouvri kò m
Vlope mò m
Kadav mwen
Tout kò m anwoule
Lè san m ap koule
Nan dra po m
Zo ak po m
Anpile nan dra po m
Pil sou pil
Kou branch fil
Fil mele
K ape file
Tache ak san
San nan venn mwen
San lonnè mwen
San diyite mwen
San fòs kouraj mwen
K ap reziste
Ak san k ap koule
San rete
San kè mwen
San mizè mwen
Layite, simaye
Sou dra po m
K ap pote zo m
Doulè mwen
Kite peyi m
Lese zanmi m
Bay patri m do
Bay fanmi m do
Jou fo zanmi m yo
Vrè lenmi m yo
Pilonnen m
Pyetine m
Ak tout dra po m
Ki fè kò ak zo m
Lè se ti ma m ki rete
Lespwa m k ap flote
Ak dra po m
Altiné Wilkens
*~