Nan peyi Dayiti
Nouvèl Kout Kreyòl
NOUVÈLJAKMÈL
Oganizasyon Gwoup 22, OG22 fete 6zyèm anivèse li
Oganizasyon OG22, yon òganizasyon pwòch Lavalas ki pran
nesans nan vil Jakmèl jou 10 mas 1995, fete 6zyèm anivèsè
li. Nan okazyon an nan aswè vandredi 9 mas la, yo te fè chante
yon mès aksyon de gras nan katedral Sen Jak ak Sen Filip nan vil
Jakmèl. Se jounen samdi ki te 10 mas, jou anivèsè
OG22, te gen yon gran rasanbleman ki te reyini plizyè milye moun
ki te sòti nan kèlke nan depatman Sidès la, nan lakou
Samba Night Club pou te brase lide sou avni òganizasyon an. Responsab
OG22 yo te fè yon bilan pozitif sou 6 lane egzistans yo. Nan kèk
pankat ki te ekspoze sou lakou a ki te pote siyati OG22 te gen slogan sa
yo: «OG22 di aba la mizè aba ensekirite», «san
jistis ak sekirite pa ka gen lapè tout bon vre». Nou te remake
prezans plizyè eli depatman nan rasanbleman sa a; pami moun ki te
pran la pawòl yo, te genyen depite Lavale a Edner Valentin, depite
Benè a Duranvil Saint Gladys ki mande pou òganizasyon popilè
yo ki se Flanbo rezistans mouvman Lavalas pou yo toujou rete mobilize e
òganize yo pi byen. Aprè rasanbleman an, nan yon pwen de
près, responsab OG22 yo te bay nan otèl Florida ki nan Jakmèl,
Linè Jean Marie manm fondatè Og22 ki t ap reponn kesyon jounalis
pwopoze gouvènman douvèti an ki gen makout ki entegre ladan
l, pou moun sa yo ki entegre ak KEP a kòm makout pa ta gen akizasyon
ki peze sou do yo, se sa Linè Jean Marie fè konnen. Antouka
fòk OG22 konnen trè byen ke akizasyon ki poze sou do makout
yo pap janm fini paske pa genyen yon grenn makout nan peyi a ki jije. Eske
ka gen rekonsilyasyon san jistis? Poukisa pèp la te goumen, se pa
pou te kaba ak koze makout sa a? Eske se bourik travay pou chwal galonnen?
Premye anivèsè Kako
Yon lòt òganizasyon popilè ki pote non KAKO (Kowalisyon
ayisyen konsekan òganize) fete jounen dimanch 11 mas 2001 an premye
rekolt kafe li. Dirijan Kako yo, aprè yo te fini fè yon pale
sou istorik Kako, te pale de vizyon ak objektif yo. Responsab yo te pwofite
pou denonse gouvènman douvèti Lavalas lan. Selon Wilner Laurent,
pòt pawòl Kako, se pa nan retire trip mete pay pwoblèm
pèp la pral rive rezoud tout bon vre. Pèp la fè twòp
sakrifis jounen jodi a pou yon bann konpwomi ap fè fèt dèyè
pòt. Fòk dirijan Lavalas yo kòmanse ranmase karaktè
yo selon Falèz François yon manm fondatè òganizasyon
an. Kako di: Kako se pa yon òganizasyon popilè ki fonn andedan
pati Fanmi Lavalas; se pito yon gwoup presyon ki la pou rele lè
revandikasyon pèp la pa ka pase. Kako fè konnen ke l ap sipòte
tout pati politik konsekan ki ap batay andedan peyi a pou yon demen miyò
e ki wè enterè peyi a avan tout bagay.
Afè deplasman mache benè a
Depi anviwon yon mwa, genyen yon tòchon ki ap boule ant majistra
komin Benè a Jean Marquel Frederick ak delege depatmantal Sidès
la Ronald Pierre sou dosye deplasman mache komin Benè a. Majistra
a pran desizyon leve mache a sou plas piblik la pou mete li nan zòn
Kan Panyòl; delege Sidès la limenm te vle pou mache a rete
nan yon premye tan. Te genyen yon rankont ki te fèt ant delege komisè
gouvènman Jakmèl la, la polis ak majistra Jean Marquel Frederick
kote ke sanble ke genyen yon akò ki te sòti ki te di pou
mache a rete sou plas piblik la jiska 7 mas 2001 an. Sanble majistra a
ta fini dakò. Ebyen se konsa jou ki te madi 5 mas 2001 delege Sidès
la Ronald Pierre te fè sòti yon kominike ki di pou mache
a pa fè yon pa kita yon pa nago, kidonk pou li toujou rete sou plas
piblik la. Brid sou kou yon gwo manifestasyon te tanmen menm madi maten
5 mas lan kont desizyon delege Ronald Pierre sou dosye sila. Dezyèm
senatè Sidès la Prince Pierre Sonson te reyaji kote li di
li pap aksepte okenn moun vini sal imaj Fanmi Lavalas nan Sidès
la.
Konvèjans lan ap fè manèv
Lendi 5 mas pase a gwo tansyon te blayi nan Otorite pòtyè
nasyonal vil Okap la apre kèk endividi te prezante devan enstitisyon
sa pou mande depa direktè a Rosemond Fabien. Plizyè kout
zam te tire. Oganizatè mouvman an te sanble ap kreye konfizyon lè
yo ta vle fè kwè se kèk otorite lavalas nan depatman
an ki ta kont Rosemond Fabien kise yon manm Fanmi lavalas. Wilner Georges
yon manm òganizayon pwòch Fanmi lavalas deklare: ni delege
Bel Angelot, ni depite James Desrosin, ni senatè yo pa mele nan
dosye sa. Wilner fè konnen li te rankontre ak Elisca Charles pòt
pawòl OPL-Konvèjans la ki t ap fè anpil mannèv
akote lokal APN nan pandan mouvman lendi sa.
Pèp la pa vle tande afè lame tòsyonè Gourgue la
Majistra komin Ba Lenbe a Pierre Teucheler nan yon deklarasyon nan yon
estasyon nan vil Okap fè konnen li konsidere zak Konvèjans
la tankou zak moun fou lè Gérard Gourgue pran desizyon pou
nome majistra. Sou zafè manifestasyon pou retou lame, majistra Teucheler
deklare li pa gen pwoblèm pou lame ta retounen, men li mande ki
lame, èske se lame ki konn maspinen pèp la? Dapre majistra
a, bagay sa inadmisib paske tout moun nan mas pèp la menm ti bebe
te viktim anba men ansyen lame tòsyonè a.
Antèman Fritz Alisma nan Okap
Mèkredi 17 mas la antèman dirijan Sendika Chofè
Nò a (STN) Fritz Alisma chante nan vil Okap, e anpil kolèg
li ak senpatizan te patisipe nan seremoni sa pou rann yon dènye
omaj a militan sa a. Fritz Alisma te pèdi lavi l pandan yon operasyon
yon semèn anvan an, e fanmiy li ta lage responsabilite lanmò
a sou dirijan seksyon chirijikal yo kite deja fann vant Alisma pandan yo
poko te menm fè analiz ni menm reyini tout materyèl pou operasyon
an. Daprè pòt pawòl Sendika pèsonèl
enfimyè a Claude Hilaire, lanmò sa se youn pami lòt
ki montre lese grennnen ki genyen nan Lopital Justinien Okap, pi spesyalman
nan sèvis chirijikal la.
Milot: Espesyalis ap analize aki yo
Apre 38 moun te mouri yo lè yo te fin manje fwi yo rele Aki a nan semenn lendi 5 mas la, 17 lòt moun te vin mouri tou nan pou menm rezon an. Majistra Milo a, Moïse Jean-Charles, anonse ke plizyè espesyalis ki ap soti Kiba ak Etazini pral analize aki sa yo pou konnen kouman fè sa alòske popilasyon an abitye itilize yo kòm legim pou manje.
*~